गान्तोक, 29 मार्च (हि.स.)। सिक्किम एथलेटिक्स एसोसिएशन र एथलेटिक्स फेडरेसन अफ् इन्डियाको संयुक्त पहलमा गान्तोक जिल्लाको रेशीथाङस्थित खेलगाउँमा आजदेखि 16औं स्टेट एथलेटिक्स मीट 2025 शुरू भएको छ। आजदेखि शुरू भएको यस कार्यक्रमको समापन आगामी 31 मार्चमा हुनेछ।
आजको उद्घाटन कार्यक्रममा विधायक सञ्जीत खरेल मुख्य अतिथि र क्षेत्र विधायक कला राई विशिष्ट अतिथिको रूपमा रहेका थिए।
उद्घाटन कार्यक्रमलाई सम्बोधन गर्दै विधायक खरेलले युवाहरूको विकासलाई बढावा दिन खेलकुदको महत्त्वमाथि जोड दिँदै खेलाडीहरूलाई उपलब्ध गराइएका सुविधाहरूको अधिकतम उपयोग गर्न आग्रह गरे। उनले सहभागीहरूले प्रदर्शन गरेको समर्पण र लचिलोपनको प्रशंसा गर्दै उनीहरूलाई प्रतियोगिताको क्रममा जस्तोसुकै परिणाम आए पनि आफ्नो कोशिशलाई निरन्तरता दिन सुझाउ दिए।
विधायक खरेलले सिक्किममा खेलकूदलाई बढावा दिन राज्यका मुख्यमन्त्री प्रेमसिंह तामाङको भूमिका महत्वपूर्ण रहेको बताए। राज्य सरकारले खेलकूद क्षेत्रलाई प्राथमिकता दिँदै राज्यका विभिन्न ठाउँहरूमा पूर्वाधार विकासको कार्य गरिरहेको उनले बताए। विधायक खरेलले युवा खेलाडीहरूलाई यी स्रोतहरूको प्रयोग गर्न प्रोत्साहित गर्दै सफलताको लागि कडा परिश्रम, अनुशासन र दृढता आवश्यक रहेको बताए।
हिन्दुस्थान समाचार / प्रदीप
