नागपुर, १५ जनवरी (हि.स.)। राष्ट्रिय स्वयंसेवक संघका सरसंघचालक डा. मोहन भागवतले मतदानका क्रममा सबै उम्मेदवारलाई अस्वीकार गर्ने ‘नोटा’ प्रयोग गर्नुको सट्टा उपलब्ध विकल्पहरूमध्ये योग्य र उत्कृष्ट उम्मेदवारको चयन गर्नु उचित हुने बताएका छन्।
महाराष्ट्रमा स्थानीय निकाय निर्वाचनका लागि बिहिबार मतदान भइरहेको छ। डा. मोहन भागवत र राष्ट्रिय स्वयंसेवक संघका पूर्व सरकार्यवाह सुरेश उपाख्य ‘भैय्याजी’ जोशीले आज महालस्थित नागपुर नाइट हाईस्कूलको मतदान केन्द्रमा मतदान गरे। मतदान गर्न आउनेहरूमा यी दुवै सबैभन्दा पहिले पुगेका थिए।
मतदानपछि डा. भागवतले भने, ‘नोटा’ को प्रयोग सबै उम्मेदवारलाई अस्वीकार गर्नु सरह हो र यो लोकतन्त्रको सबैभन्दा खराब अवस्था मानिन्छ। यसले वास्तवमा अवाञ्छित उम्मेदवारहरूलाई अप्रत्यक्ष रूपमा फाइदा पुर्याउँछ। त्यसैले उपलब्ध उम्मेदवारहरूमध्ये योग्य र सर्वश्रेष्ठ उम्मेदवारको चयन गरिनुपर्छ।
उनले लोकतान्त्रिक व्यवस्थामा मतदान अत्यन्त महत्वपूर्ण रहेको र यसलाई प्रत्येक नागरिकको कर्तव्य बताए। उनले जनहितलाई ध्यानमा राखेर मतदान गर्न जोड दिए। अराजकताको अर्थ राजा वा नेतृत्वको अभावको अवस्था हो, जुन समाजका लागि घातक हुने उनले उल्लेख गरे।
डा. भागवतले महाभारतको सन्दर्भ दिँदै त्यसमा पनि सही नेतृत्वको चयनको महत्वलाई स्पष्ट रूपमा रेखांकित गरिएको बताए। उनले निर्वाचन आयोगद्वारा मतदानसम्बन्धी निरन्तर जनजागरण अभियान सञ्चालन भइरहेको र त्यसको प्रभाव क्रमशः देखिन थाल्ने विश्वास व्यक्त गरे। अन्त्यमा उनले फेरि एकपटक ‘नोटा होइन, उपलब्ध विकल्पहरूमध्ये सर्वश्रेष्ठको चयन’ गर्न आह्वान गरे।
हिन्दुस्थान समाचार / भवानी थामी
