कोलकाता, ०९ जनवरी (हि.स.)। विश्वप्रसिद्ध गङ्गासागर मेला शुरु हुनुअघि शुक्रबार कपालमुनि मन्दिर नजिक नम्बर–२ सडक किनारामा बनाइएका धेरै अस्थायी शिविरहरूमा अचानक आगलागी भएको छ। आगो लागेपछि होगला (घाँस–फुस) बाट बनाइएका झुपडीहरू छिट्टै दन्किन थाले र केही समयमै एकपछि अर्को शिविर पूर्ण रूपमा जलेर खरानी भए।
प्रारम्भिक जानकारीअनुसार, मेला क्षेत्रमा विभिन्न सरकारी विभागद्वारा अस्थायी शिविर निर्माण भइरहेको थियो। ती शिविरहरूमा सरकारी अधिकारी, सूचना तथा संस्कृति विभागका कर्मचारी तथा पत्रकारहरूको बसोबासको व्यवस्था गर्ने तयारी थियो। यसमा आगलागी भएपछि सनसनी फैलियो।
सूचना पाएलगत्तै दमकल विभागका धेरै गाडीहरू घटनास्थलमा पुगे र कडा प्रयासपछि आगो नियन्त्रणमा लिइयो। राहतको कुरा के छ भने यस घटनामा हालसम्म कुनै मानवीय क्षतिको खबर छैन। आगलागीको कारण भने अहिलेसम्म पत्ता लाग्न सकेको छैन।
मेला प्रशासनले घटनाको विस्तृत छानबिन गर्न आदेश दिएको छ। मेला सुरक्षाको जिम्मा सम्हालिरहेका एक वरिष्ठ अधिकारीले आगलागीको कारण पत्ता लगाउन छानबिन समिति गठन गरिने जानकारी दिएका छन्।
गङ्गासागर मेलामा तीर्थयात्रीहरूको आगमन आइतबारदेखि शुरु हुने अपेक्षा गरिएको छ। एक हप्ताको अवधिमा करिब ४० देखि ५० लाख श्रद्धालुहरू पुग्ने अनुमान गरिएको छ।
---------------
हिन्दुस्थान समाचार / भवानी थामी
