औरैया, २५ अक्टोबर (हि.स.)। उत्तर प्रदेशको औरैया जिल्लाको अजीतमल कोतवाली क्षेत्र अन्तर्गत बाबरपुर स्थित एक इन्टर कलेजका व्यवस्थापकमाथि कक्षा १० मा अध्ययनरत विद्यार्थीलाई लट्ठीले कुटपिट गरेको र त्यसबाट उनको आँखामा गम्भीर चोट लागेको आरोप लागेको छ। विद्यार्थीका पिताले दिएको उजुरीका आधारमा कोतवाली पुलिसले कलेज व्यवस्थापक विरुद्ध मुद्दा दर्ता गरेको छ।

कोतवाली क्षेत्रको चाँवरपुर निवासी स्वर्गीय कृष्ण स्वरूपका छोरा अजीत सिंह राजपूतले पुलिसलाई दिएको उजुरीमा उनका छोरा आर्यन बाबरपुर स्थित बीआरएसडी इन्टर कलेजमा कक्षा १० मा अध्ययनरत रहेको उल्लेख गरेका छन्।

उजुरी अनुसार, ३० जुलाई २०२६ मा मध्याह्न भोजनावकाशका क्रममा खाना खाएपछि आर्यन लघुशंकाका लागि गएका थिए। त्यसपछि कक्षाकोठामा फर्किने क्रममा कलेज व्यवस्थापक आरएस मिश्र लट्ठी लिएर आए र उनलाई कुटपिट गर्न थालेको आरोप छ। पिताको दाबीअनुसार, लट्ठीले कुटपिट गर्दा छोराको आँखामा गम्भीर चोट लागेको र त्यसका कारण आँखामा क्षति पुगेको छ। यस विषयमा विद्यार्थीका पिताले पुलिससँग कारबाहीको माग गरेका थिए।

कोतवालीका प्रभारी निरीक्षक विनोद कुमारले विद्यार्थीका पिताले दिएको उजुरीका आधारमा कलेज व्यवस्थापक आरएस मिश्र विरुद्ध सम्बन्धित कानूनी धारा अन्तर्गत मुद्दा दर्ता गरिएको बताए। उनले घटनामा कानूनअनुसार कारबाही अघि बढ़ाइएको जानकारी दिए।

/ बिशाल