आसनसोल, ०८ नोभेम्बर (हि.स.)। पश्चिम बङ्गालबाट झारखण्डमा अवैध रूपमा रक्सी तस्करी भइरहेको घटनाको खुलासा भएको छ। जामताडा पुलिसले गोप्य सूचनाका आधारमा महेशमुन्डा चेकपोस्टमा छापा मारेर ४३४ बोतल अंग्रेजी रक्सी जफत गरेको छ। यस घटनामा पुलिसले तीन जनालाई पक्राउ गर्नुका साथै तस्करीमा प्रयोग गरिएको एउटा स्कर्पियो र एउटा मोटरसाइकल पनि जफत गरेको छ।
पुलिस अनुसार, ७ नोभेम्बरमा प्राप्त गोप्य सूचनाका आधारमा छापा मार्ने टोली गठन गरिएको थियो। सवारीसाधन जाँचका क्रममा बङ्गालतर्फबाट आइरहेको स्कर्पियो रोकेर तलासी लिँदा विभिन्न ब्रान्डका ४३४ बोतल रक्सी फेला परेको थियो। जफत रक्सीमा इम्पेरियल ब्लुका २४०, आइकोनिक ह्वाइटका ९२, ब्लेन्डर्स प्राइडका ३६, अफिसर्स च्वाइसका ४२ र स्नोकीका २४ बोतल रहेका छन्।
पुलिसले स्कर्पियोमा झारखण्डका दुईवटा नम्बर प्लेट समेत फेला पारेको थियो। घटनामा संलग्न अमित कुमार र चन्दन कुमारलाई पक्राउ गरिएको छ। त्यस्तै, तस्करीका लागि बाटोको निगरानी गरेको आरोपमा मोटरसाइकल चालक दयामय मण्डललाई पनि पक्राउ गरिएको छ।
पुलिसले उनीहरूदेखि चार वटा मोबाइल फोन र २६ हजार २०० रुपियाँ नगद जफत गरेको छ। पक्रा परेका अमित र चन्दन बिहारको बाँका जिल्लाका हुन् भने दयामय झारखण्डको देवघर जिल्लाका निवासी हुन्।
नाला थाना प्रभारी पुलिस निरीक्षक विकास यादवको नेतृत्वमा गरिएको यस कारबाहीपछि पुलिसले रक्सी तस्करीमा संलग्न अन्य व्यक्ति तथा आपूर्ति सञ्जालबारे अनुसन्धान गरिरहेको छ।
/ बिशाल
