साम्बा, १४ जुलाई (हि.स.)। जम्मू-कश्मीरको साम्बा जिल्लामा एउटा ड्रोन फेला परेको छ। अधिकारीहरूका अनुसार, मंगलबार जिल्लाको चक सलारिया क्षेत्रस्थित देवक नजिकको खेतमा एक स्थानीय बासिन्दाले ड्रोन फेला पारेका हुन्। उनले बिहान खेतमा ड्रोन देखेपछि तत्काल नजिकै रहेको भारतीय सेनाको युनिटलाई जानकारी दिएका थिए। त्यसपछि सेनाले उक्त ड्रोन नियन्त्रणमा लिएको छ।
अधिकारीहरूले ड्रोनलाई फरेन्सिक परीक्षणका लागि पठाएको बताएका छन्। परीक्षणमार्फत यो ड्रोन कहाँबाट आएको हो, यसको प्राविधिक विशेषता के हो तथा सीमा पारका कुनै गतिविधिमा यसको प्रयोग भएको थियो वा थिएन भन्ने विषयमा अनुसन्धान गरिनेछ।
यसअघि नजिकैको नन्दपुर गाउँमा सोमबार राति सेनाका जवानहरूले अरनिया क्षेत्रतर्फबाट आउँदै गरेको एउटा शंकास्पद उड्ने वस्तु देखेका थिए, जसलाई ड्रोन भएको आशंका गरिएको थियो। अधिकारीहरूका अनुसार, त्यसलगत्तै सेनाले आफ्नो एन्टी-ड्रोन प्रोटोकल सक्रिय गर्दै शंकास्पद ड्रोनलाई निष्क्रिय पार्न जामिङ अभियान सञ्चालन गरेको थियो।
अधिकारीहरूको अनुमानमा खेतमा फेला परेको ड्रोन त्यही शंकास्पद उड्ने वस्तु हुन सक्ने र जामिङ अभियानपछि जमिनमा खसेको हुन सक्ने सम्भावना रहेको छ।
---------------
हिन्दुस्थान समाचार / भवानी थामी
