नयाँ दिल्ली, २० जुलाई (हि.स.)। मनसुन सत्रको पहिलो दिन आज प्रस्तावित संसद मार्चलाई ध्यानमा राख्दै राष्ट्रिय राजधानीमा सुरक्षा व्यवस्था कड़ा पारिएको छ। यसैबीच सामाजिक कार्यकर्ता सोनाम वाङचुकले आफ्नो अनशन अन्त्य गर्नका लागि तीन वटा सर्त अघि सारेका छन्।
सामाजिक सञ्जालमा गरिएको पोस्ट मार्फत वाङचुकले 20 जुलाईमा आफ्नो अनशन त्यतिबेला मात्र अन्त्य गर्ने बताएका छन्, जब उनका तीनमध्ये कुनै एक सर्त पूरा हुनेछ।उनकी पत्नीले उनलाई निजी अस्पतालमा स्थानान्तरण गर्न माग गर्दै दिल्ली उच्च अदालतको खण्डपीठमा याचिका दिएकी छन्।
वाङचुक अनुसार, सरकारले शिक्षा व्यवस्थाको असफलता तथा प्रश्नपत्र लीक जस्ता घटनाको जिम्मेवारी स्वीकार गरेमा उनले अनशन अन्त्य गर्नेछन्। अथवा, यदि सीजेपीको नेतृत्व संसदको प्रवेशद्वारसम्म पुग्न सफल भयो र विभिन्न राजनीतिक दलका सांसदहरूले उक्त विषय संसदमा उठाउने आश्वासन दिए भने पनि उनले अनशन तोड्नेछन्। अथवा स्वास्थ्य वा अन्य कारणले उनी त्यसो गर्न सक्षम नभएमा विभिन्न दलका सांसदहरू अस्पतालमा पुगेर सोही आश्वासन दिनुपर्ने उनले बताएका छन्।
यसैबीच दिल्ली मेट्रो रेल निगम (डीएमआरसी) ले सुरक्षा कारण देखाउँदै जनपथ, राजीव चौक, पटेल चौक, केन्द्रिय सचिवालय र सेवा तीर्थ मेट्रो स्टेशनहरू अर्को सूचना जारी नभएसम्म सर्वसाधारण यात्रुका लागि बन्द रहने घोषणा गरेको छ।
संसद मार्चलाई मध्यनजर गर्दै संसद परिसर तथा वरपरका क्षेत्रमा सुरक्षा व्यवस्था थप सुदृढ़ बनाइएको छ। दिल्ली पुलिस, र्यापिड एक्सन फोर्स (आरएएफ) र वज्र वाहनहरू परिचालन गरिएका छन् भने संसद मार्ग थाना क्षेत्र वरपर ब्यारेकेडहरू पनि जड़ान गरिएको छ।
हिन्दुस्थान समाचार / भवानी थामी
