जम्मू, 05 अगस्त (हि.स.)। जम्मू-कश्मीरबाट धारा 370 र 35ए खारेज भएको आज सातौँ वार्षिकोत्सव हो। यसलाई ध्यानमा राख्दै उपत्यकामा कडा सुरक्षा व्यवस्था गरिएको छ। पीडीपी र नेसनल कन्फरेन्सले विरोध प्रदर्शनको आह्वान गरेका छन्। अमरनाथ यात्रीहरूको आवागमनमा सुरक्षाको कारणले रोक लगाइएको छ। यो निलम्बन अस्थायी हो। साथै, राज्यमा अभूतपूर्व सुरक्षा व्यवस्था गरिएको छ।

अधिकारीहरूले भने, कुनै पनि जत्थालाई जम्मूबाट बालटाल आधार शिविरतिर जान अनुमति दिइएको छैन। बालटालबाट जम्मू फर्कने तीर्थयात्रीहरूलाई पनि रोक लगाइएको छ। निलम्बन हुनुअघि बालटाल आधार शिविरमा पुगेका तीर्थयात्रीहरूलाई निर्धारित समयअनुसार पवित्र गुफा मन्दिर जाने अनुमति दिइएको छ। यात्रा नियन्त्रित रूपमा अघि बढिरहेको छ। नयाँ र फर्कने ब्याचका यात्रुहरूको आवागमनलाई आज सावधानीका रूपमा मात्र निषेध गरिएको अधिकारीहरूले बताए।

यसैबीच, कश्मीरमा पुलिसले पूर्व अनुमति बिना विरोध प्रदर्शनमा प्रतिबन्ध लगाएको छ, जबकि जम्मूका अधिकारीहरूले सम्भावित आतङ्कवादी हमलाहरूको गुप्तचर सूचनापछि सम्पूर्ण क्षेत्रलाई उच्च सतर्कतामा राखेका छन्। श्रीनगर, बारामुल्ला, कुपवाडा, बन्दिपोरा, गान्दरबल, बडगाम, पुलवाम, शोपियाँ, कुलगाम र अनन्तनागमा सक्षम अधिकारीको पूर्व अनुमतिबिना कुनै पनि विरोध, र्याली, जुलुस वा अन्य कुनै सार्वजनिक सभालाई अनुमति दिइने छैन।

यसैबीच, जम्मूमा अभूतपूर्व सुरक्षा घेरा लगाइएको छ। गुप्तचर निकायहरूले धारा 370 को वार्षिकोत्सव, चलिरहेको अमरनाथ यात्रा र आगामी स्वतन्त्रता दिवसलाई ध्यानमा राख्दै सम्भावित आतङ्कवादी हमलाहरूको चेताउनी दिएका छन्। अधिकारीहरूका अनुसार, आतङ्ककारीहरूले शैक्षिक संस्थानहरूसहित संवेदनशील स्थानहरूलाई लक्षित गर्ने प्रयास गर्न सक्ने गुप्तचर सूचनाहरूले सङ्केत गरेको छ।

सम्भावित आतङ्कवादी खतराहरूबारे विशेष गुप्तचर सूचनाको आधारमा यो निर्णय गरिएको अधिकारीहरूले बताए।

हन्डवाड़ा र सोपोर पुलिसले पनि पूर्व अनुमतिबिना कुनै पनि विरोध प्रदर्शनलाई अनुमति नदिने घोषणा गरेको छ। पुलवाम र सोपियाँ पुलिसले मानिसहरूलाई कानून प्रवर्तन एजेन्सीहरूसँग सहयोग गर्न, शान्ति कायम गर्न, अफवाह वा अप्रमाणित जानकारी फैलाउन नदिन र कुनै पनि संदिग्ध गतिविधिको बारेमा नजिकको पुलिस स्टेसनमा रिपोर्ट गर्न अपील गरेको छ। जिल्लाभर पर्याप्त सुरक्षा व्यवस्था गरिएको बन्दिपोरा पुलिसले जनाएको छ।

--------

हिन्दुस्थान समाचार / भवानी थामी