पाकिम, १६ सेप्टेम्बर (हि.स.)। १५७औँ गान्धी जयन्तीको अवसरमा आयोजित स्वर्गीय शिवकुमार शर्मा स्मृति खुल्ला फुटबल प्रतियोगिता २०२६ बुधबार पाचेखानीस्थित सरकारी माध्यमिक विद्यालयको खेलमैदानमा शुरु भएको छ। प्रतियोगिताको आयोजना सरकारी माध्यमिक विद्यालय, पाचेखानी तथा विद्यालय प्रबन्धन समितिले छलमथाङ-पाचेखानी ग्राम पञ्चायत एकाई, पाकिम जिल्लाको सहकार्यमा गरिएको हो।
कार्यक्रममा मुख्यमन्त्रीका सल्लाहकार विष्णुकुमार खतिवडा मुख्य अतिथिका रूपमा उपस्थित थिए। प्रतियोगिताको उद्घाटन खेल ट्राइबल स्पोर्टिङ क्लब र डीजीपीयूबीच भएको थियो। खेलमा ट्राइबल स्पोर्टिङ क्लबले डीजीपीयूलाई १०-२ गोलले पराजित गऱ्यो।
यस अवसरमा सरकारी माध्यमिक विद्यालय, पाचेखानीका विद्यार्थीहरूले रंगारंग सांस्कृतिक कार्यक्रम पनि प्रस्तुत गरेका थिए। फुटबल प्रतियोगिताको फाइनल खेल १५७औँ गान्धी जयन्ती समारोहअन्तर्गत आगामी २ अक्टोबरमा आयोजना गरिने बताइएको छ।
हिन्दुस्थान समाचार / बिशाल
