मुम्बई, ७ अक्टोबर (हि.स.)। अभिनेत्री शिल्पा शेट्टी र उनका पति राज कुन्द्रा एक कथित ६० करोडको ठगी प्रकरणमा चर्चाको केन्द्रमा छन्। यस प्रकरणमा मुम्बई पुलिसले आर्थिक अपराध शाखा मार्फत अभिनेत्रीसँग लामो समयसम्म सोधपुछ गरेको छ।
सूत्रका अनुसार, ईओडब्ल्यूको टोलीले शिल्पाको मुम्बईस्थित आवासमा गएर लगभग ४ घण्टा ३० मिनेटसम्म सोधपुछ गरेको छ। अनुसन्धान एजेन्सीले शिल्पाबाट ठगीसँग सम्बन्धित एड कम्पनीका ब्याङ्क खाता र लेनदेनबारे जानकारी मागे। अभिनेत्रीले ईओडब्ल्यूलाई धेरै महत्वपूर्ण दस्तावेज र ब्याङ्क विवरणहरू उपलब्ध गराएकी छिन्, जसको अनुसन्धान अहिले जारी छ।
ईओडब्ल्यूसँग सम्बन्धित स्रोतका अनुसार शिल्पा र राज दुवै त्यही कम्पनीका निर्देशक थिए, जसमार्फत यो लेनदेन भएको थियो। एजेन्सीले कम्पनीसँग सम्बन्धित वित्तीय गतिविधि र लगानी सम्झौताहरूको बारीकीसँग छानबिन गरिरहेको छ।
यसअघि व्यवसायी दीपक कोठारीले जोडीमाथि आरोप लगाएका थिए कि उनीहरूले लोन-कम-इन्वेस्टमेन्ट डीलको नाममा ६० करोडको ठगी गरे। सोही उजुरीको आधारमा अगस्ट महिनामा जुहू पुलिस चौकीमा एफआईआर दर्ता गरिएको थियो। अनुसन्धान अघि बढ्दै गर्दा, ईओडब्ल्यूले हालसम्म राज कुन्द्रासहित कुल ५ व्यक्तिको बयान लिइसकेको छ। साथै धेरै वित्तीय दस्तावेज र ब्याङ्क ट्रान्जेक्शनको पनि छानबिन भइरहेको छ।
शिल्पा शेट्टीले सोधपुछको क्रममा पूरा सहयोग गर्ने प्रतिबद्धता जनाएकी छन्। यसअघि पनि मुम्बई पुलिसले शिल्पा र राज कुन्द्राविरुद्ध लुकआउट नोटिस जारी गरेको थियो, ताकि उनीहरू देश बाहिर जान नपुन्। हाल ईओडब्ल्यू टोली कम्पनीका ब्याङ्क रेकर्ड, लगानी दस्तावेज र लेनदेनको श्रृंखलाको छानबिनमा व्यस्त छ। आगामी दिनमा एजेन्सीले अन्य प्रमुख गवाह र सम्बन्धित अधिकारीहरूसँग पनि सोधपुछ गर्न सक्नेछ।
हिन्दुस्थान समाचार / भवानी थामी
