गान्तोक, 24 नोभेम्बर (हि.स.)। विद्या भारती सिक्किम अन्तर्गतका सम्पूर्ण विद्यालयहरूमा आजदेखि वार्षिक परीक्षा-२०२५ विधिवत रूपमा शुरु भएको छ।
प्रान्तको शैक्षिक टोली तथा विषय प्रमुखहरूले तयार पारेका प्रश्नपत्रहरू पूर्ण रूपमा गुणस्तरीय शिक्षा, शैक्षिक उत्कृष्टता र विद्यार्थीहरूको सर्वाङ्गीण विकासमा आधारित छन्। यी प्रश्नपत्रहरू विद्यार्थीहरूको रटन्त ज्ञानको सट्टा बुझाइ, विश्लेषण र प्रयोगात्मक क्षमताको मूल्याङ्कन गर्न विशेष रूपले बनाइएका छन्।
सिक्किम प्रान्तका सबै विद्यालयहरूमा परीक्षाको पूर्ण एकरूपता कायम गर्न प्रान्तीय कार्यालयले विस्तृत नियमावली तथा निर्देशनहरू सबै विद्यालयहरूलाई पठाएको छ। ती निर्देशनहरूअनुसार सबै केन्द्रहरूमा एकै समयतालिका र एकै प्रश्नपत्रबाट परीक्षा सञ्चालन भइरहेको छ।
विद्या भारती सिक्किम प्रान्तले सम्पूर्ण विद्यालयका विद्यार्थीहरूलाई सफल र उत्कृष्ट परीक्षा परिणामको लागि हार्दिक शुभकामना व्यक्त गरेको छ। साथै, सफल शैक्षिक सत्र सञ्चालनका लागि सबै विद्यालयका व्यवस्थापन समिति, प्रधानाध्यापकहरू, शिक्षक-शिक्षिकाहरू तथा सम्पूर्ण कर्मचारीहरूप्रति हार्दिक आभार र धन्यवाद ज्ञापन गरेको छ।
विद्या भारती सिक्किमद्वारा सञ्चालित यो परीक्षा प्रणाली राज्यमा संस्कारयुक्त शिक्षाको प्रसार र शैक्षिक एकरूपतातर्फ एक महत्त्वपूर्ण कदम मानिएको विद्या भारती सिक्किमका कार्यालय प्रमुख सूर्य धितालले आज प्रेस विज्ञप्तिमा उल्लेख गरेका छन्।
हिन्दुस्थान समाचार / बिशाल
