नयाँ दिल्ली, 9 नोभेम्बर (हि.स.)। भारतीय शूटर अर्जुन बाबूता काहिरामा भएको अन्तरराष्ट्रिय सुटिङ स्पोर्ट फेडरेशन (आईएसएसएफ) विश्व राइफल/पिस्टल च्याम्पियनशिपको उद्घाटन दिन पुरुष १० मिटर एयर राइफल फाइनलमा सातौं स्थानमा रहे।
अर्जुनले छनोट चरणमा ६३२.५ को स्कोरका साथ फाइनलमा स्थान बनाएका थिए, तर उनले फाइनलमा १४५.० स्कोर गर्दै सातौं स्थानमा रहे।
जर्मनीका म्याक्सिमिलियन डेलिन्गरले उक्त प्रतियोगितामा स्वर्ण पदक जिते भने वर्तमान विश्व च्याम्पियन भिक्टर लिन्डग्रेन (स्वीडेन) ले रजत र ओलम्पिक च्याम्पियन शेङ लिआओ (चीन) ले कांस्य पदक जिते।
अर्जुनले पहिलो शृङ्खलामा ५१.९ (१०.६, ९.८, १०.६, १०.५, १०.४) र दोस्रो शृङ्खलामा ५२.३ (१०.६, १०.१, १०.७, १०.२, १०.७) बाट फाइनल शुरु गरे। यद्यपि, ११ औं शटमा ९.७ को कम स्कोरले उनको वरीयता घट्यो र उनी दोस्रो शूटरको रूपमा प्रतियोगिताबाट बाहिरिए।
यसैबीच, पुरुषहरूको २५ मिटर र्यापिड फायर पिस्तोल प्रतियोगितामा भारतका अनिश भंवालाले उत्कृष्ट २९१-११x प्रहार गर्दै छनोटको पहिलो चरणपछि सातौं स्थानमा रहे। समीर गुलियाले २८६-३x र आदर्श सिंहले २८५-८x अङ्क बनाए। यस स्पर्धाको दोस्रो चरण र फाइनल भोलि खेलिनेछ, जसमा शीर्ष छ जना शूटरहरू फाइनलको लागि छनोट हुनेछन्।
हिन्दुस्थान समाचार / भवानी थामी
