खरसाङ, 22 दिसम्बर (हि.स.)। तीनधारे महानदी समष्टिको सिविटार चियाबारी आधारित स्प्रिङडेल एकेडेमीको वार्षिक पुरस्कार वितरण समारोह साथै सम्मान कार्यक्रम आज सम्पन्न भएको छ। उक्त कार्यक्रमको अध्यक्षता स्कूलका प्राचार्य शरणकुमार राईले गरेका थिए। कार्यक्रममा प्रमुख अतिथिको रुपमा पूर्व प्रधान अध्यापक, पूर्व पञ्चायत प्रधान एवं महानदी सिविटार वरिष्ठ नागरिक कल्याण समाजको मुख्य सल्लाहकार जुद्ध शमशेर छेत्री उपस्थित रहेका थिए।
शिक्षिकाद्वय ईशा राई र सुनिति घिसिङले सञ्चालन गरेको कार्यक्रममा स्कूलको वार्षिक प्रतिवेदन र विवरण प्राचार्य शरणकुमार राईले राखे। कार्यक्रममा विद्यार्थीहरुले सामूहिक गीतहरु प्रस्तुत गरेका थिए।
कार्यक्रममा स्कूलका प्रि नर्सरीदेखि चौथो श्रेणीसम्मका विद्यार्थीहरुलाई शैक्षिक सत्र 2025 को वार्षिक परीक्षाको परिणाम र पारितोषिकहरु वितरण गरियो। कार्यक्रमका विशिष्ट अतिथिहरु वरिष्ठ नागरिकहरु शमशेर छेत्री, जगनाथ छेत्री, दुर्गाप्रसाद तामाङ, पूर्व शिक्षक हनोक थापा र पूर्व शिक्षिका अमृता राईको बाहुलीबाट पुरस्कार प्रदान गरियो।
यसका साथै विभिन्न प्रतियोगितामूलक कार्यक्रमहरूमा प्रथम, दोस्रो र तेस्रो हुने विद्यार्थीहरूलाई पनि पारितोषिक वितरण गरियो। स्कूलमा वर्षभरि नियमित स्कूल आउने विद्यार्थी अभियोग राईलाई पनि पुरस्कृत गरियो। साथै, चौथो श्रेणीबाट पास आउट भएर गएका तीनजना विद्यार्थीहरु क्रमैले सुमन छेत्री, संस्कृति छेत्री र अनिकेत छेत्रीलाई सम्मान पत्र प्रदान गरेर सम्मानसहित बिदाई दिइएको छ।
कार्यक्रममा स्प्रिङडेल एकाडेमीको पूर्व शिक्षिका अमृता राई, पूर्व शिक्षकद्वय असीत राई र हनोक थापालाई सम्मान पत्र र शल ओढाएर सम्मान जनाइयो। कार्यक्रमका प्रमुख अतिथिहरूले आफ्नो सम्बोधनमा आज यस स्कूलको वार्षिक कार्यक्रममा चार पुस्ता भेला भएको बताउँदै स्कूलको वार्षिक परिणाम उत्कृष्ट भएको बताए। उनले यो गाउँको स्थानीय स्कूल भएकाले सबै गाउँलेहरुले यसको संरक्षण गर्नु आवश्यक रहेको बताउॅंदै सबैलाई आफ्ना नानीहरु यहाँ पढाउन आह्वान् गरे।
पत्रकारहरुसित कुराकानी गर्दै प्राचार्य शरणकुमार राईले 2010 मा स्थापना भएको यस विद्यालयले अहिलेसम्म राम्रो रेकर्ड राखेको बताए। उनले आज स्कूलको सोह्रौं वार्षिक पारितोषिक वितरण कार्यक्रम रहेको र यस स्कूलका पूर्व विद्यार्थीहरुले अहिले कलेज स्तरमा राम्रो परिणाम प्राप्त गरिरहेको पनि बताए। उनले कार्यक्रममा उपस्थित सबैलाई धन्यवाद दिएका छन्।
हिन्दुस्थान समाचार / हनोक
