— सिक्किममा 5 वर्षको अन्तरालपछि कैलाश मानसरोवर यात्रा पुनः शुरु हुनेछगान्तोक, 01 जून (हि.स.)। पाँच वर्षको अन्तरालपछि सिक्किम सरकारले भगवान् शिवको निवासस्थलको पवित्र तीर्थस्थल कैलाश मानसरोवर यात्राको आयोजना गर्ने तयारी गरिरहेको छ। यो यात्रा 15 जून, 2025 मा तीर्थयात्रीहरूको पहिलो समूह गान्तोकमा आगमनका साथ शुरु हुनेछ।

सिक्किम सरकारको पर्यटन तथा नागरिक उड्डयन विभागका अतिरिक्त मुख्य सचिव सीएस रावले गान्तोकमा आकाशवाणी समाचारसँग भएको एक अन्तर्वार्तामा चलिरहेको तयारीको विवरण साझा गरेको पीआईबीले आज उक विज्ञप्तिमा जनाएको छ।

रावले बताए अनुसार, कैलाश मानसरोवर यात्रा गान्तोकबाट शुरु हुनेछ र कैलाश र मानसरोवरसम्म पुग्नका लागि चिनियाँ क्षेत्रलाई पार गर्नअघि नथुलासम्म जानेछ। यात्रालाई सुगम बनाउनका लागि गान्तोक र नथुलाबीच जलवायु अनुकूलन केन्द्रहरू स्थापना गरिएका छन्। सम्पूर्ण यात्रा पूरा हुन लगभग 20-21 दिन लाग्ने अपेक्षा गरिएको छ।

उनले थप उल्लेख गरे अनुसार, यात्रीहरूको पहिलो जत्थाले 11 जून, 2025 मा दिल्लीमा रिपोर्ट गर्नेछ र यात्रा शुरु गर्नुअघि चिकित्सा जाँच र आवश्यक पर्मिट र मञ्जुरी प्राप्त गर्नेछ। यात्रा 48 जना यात्रीहरूका 10 जत्थाद्वारा गरिनेछ, जसमा सम्पर्क अधिकारी, भान्से र सहायक कर्मचारीहरू पनि हुनेछन्।

रावले अझ जानकारी दिए अनुसार, राज्य सरकारले यात्रीहरूको लागि विस्तृत व्यवस्था गरेको छ, जसमा गान्तोकमा एक व्यापक यात्रा-पूर्व कार्यक्रम सामेल छ, जसमा योग कक्षा, बिहानको व्यायाम सत्र र ध्यान कार्यक्रम सामेल छन्। यात्रीहरूलाई मार्ग र यात्रा कार्यक्रमको बारेमा परिचित गराउनका लागि पर्यटन विभाग र सिक्किम पर्यटन विकास निगमद्वारा ब्रिफिङ सत्र आयोजन गरिनेछ। यस अतिरिक्त, पर्यटन विभाग र भारत पर्यटन कार्यालयका अधिकारीहरूले यात्रीहरूसँग अन्तरक्रिया गर्नेछन् र उनीहरूसँग हुन सक्ने कुनै पनि शङ्का वा चिन्तालाई समाधान गर्नेछन्।

यात्रालाई सुचारू र सफल बनाउनका लागि राज्य सरकारले एक मजबुत रसद र सहायता प्रणाली स्थापित गरेको छ। यसमा मार्गमा विभिन्न स्थानहरूमा आवास, भोजन, चिकित्सा सुविधा र आपतकालीन सेवाहरूको व्यवस्था सामेल छन्। कैलाश मानसरोवर यात्रा एक असाधारण साहसिक कार्य हो जसको लागि सावधानीपूर्वक योजना र तयारीको आवश्यकता पर्दछ।

रावले यात्रीहरूलाई उनीहरूको यात्राभरि असाधारण सहायता र मार्गदर्शन प्राप्त होस् भन्ने कुरा सुनिश्चित गर्न राज्य सरकारले उल्लेखनीय संसाधनहरू निवेश गरेको उल्लेख गरे। उनले यात्रीहरूका लागि एक स्मरणीय तथा समृद्ध अनुभव प्रदान गर्ने राज्य सरकारको प्रतिबद्धतालाई थप जोड दिए, जसमा व्यापक समर्थन र रसदको लागि सेनाका अधिकारी र आईटीबीपीसँग समन्वय र परिवारहरूलाई सूचित राख्नका लागि प्रमुख स्थानहरूमा हटलाइनको व्यवस्था सहित व्यापक तयारी भइरहेको विषयमा प्रकाश पारे।

रावले स्वास्थ्य विभाग, पुलिस विभाग, विद्युत् विभाग, जनस्वास्थ्य अभियान्त्रिकी (पीएचई) विभाग र दूरसञ्चार विभाग सहित यात्रालाई सुविधाजनक बनाउनमा सामेल प्रमुख विभागहरूको रूपरेखा प्रस्तुत गरे।

सिक्किमको अनौठो आकर्षणको बारेमा रावले भने, “सिक्किमको विशिष्ट भौगोलिक स्थिति र जलवायुले यसलाई कैलाश मानसरोवर यात्राको लागि एक आदर्श गन्तव्य बनाउँछ। 7096 वर्ग किलोमिटरमा फैलिएको यसको सामान्य आकार भए तापनि सिक्किममा 6 प्रभावशाली वनस्पतिहरू र 300 मिटरदेखि 8586 मिटरसम्मको उल्लेखनीय उँचाई छन्, जुन कञ्चनजङ्घा पर्वतमा टुङ्गिन्छ। उल्लेखनीय कुरा के छ भने गान्तोकदेखि नथुलासम्मको केवल 49 किलोमिटरको दुरीमा यात्रीहरूले 3-4 अलग-अलग वनस्पतिहरूको अनुभव गर्न सक्नेछन्।”

यात्रीहरूलाई न्यानो स्वागत जनाउँदै रावले उनीहरूलाई आवश्यक ऊनी कपड़ा र नियमित औषधिहरू बोक्न सल्लाह दिए, जबकि सामान्य औषधिहरू उपलब्ध हुनेछन्, विशेष औषधिहरू उपलब्ध नहुन सक्छन्। उनले थप उल्लेख गरे अनुसार, सिक्किम सरकारले यात्रीहरूको सुरक्षा र कल्याण सुनिश्चित गर्दै उनीहरूलाई 100% पूर्ण हृदयले समर्थन गर्ने वाचा गरेको छ।

सिक्किम सरकारले प्रतिष्ठित कैलाश मानसरोवर यात्राका लागि विश्वभरिका पर्यटकहरूलाई स्वागत गर्न तयारी गरिरहेको छ, रावले आगन्तुकहरूलाई सरकारी अधिकारी र कर्मचारीहरूबाट असाधारण समर्थन प्राप्त हुने आश्वासन दिएका छन्, यसका साथै राज्यको विशिष्ट न्यानो आतिथ्यले उनीहरूको यात्रा निर्बाध र आनन्ददायक हुने बताए।

सिक्किममा आफ्नो प्रवासको क्रममा, यात्रीहरूले स्थानीय समुदायसँग जोड़िने र राज्यको जीवन्त सांस्कृतिक विरासतको अनुभव गर्ने अवसर पनि पाउनेछन्।

हिन्दुस्थान समाचार / बिशाल