नयाँ दिल्ली, 24 अगस्त (हि.स.)। केन्द्रिय गृह मन्त्री अमित शाहले आइतवार दिल्ली विधानसभामा दुई दिवसीय अल इण्डिया स्पीकर्स कन्फ्रेन्सको उद्घाटन गरे। यस अवसरमा उनले भने, सदन लोकतन्त्रको इन्जिन हुन्छ, यसैले विपक्षद्वारा संसद तथा विधानसभाहरूको कारबाहीलाई बाधित गर्ने प्रवृत्ति चिन्ताजनक हो।

शाहले भने, लोकतान्त्रिक प्रणालीमा सत्ता र विपक्ष दुवैको भूमिका महत्वपूर्ण हुन्छ, तर धेरै दिनसम्म सदनलाई चल्न नदिनु लोकतन्त्रको भावनाको विपरीत हो। सदन जनताको आकांक्षाहरूको प्रतीक हो र सार्थक बहसबाटै जनकल्याणकारी कानून बन्छ। विधानसभा र संसद केवल बहसको मंच नभएर विवेक र विचारको संगम हो। शाहले उपस्थित सबै अध्यक्षहरू र उपाध्यक्षहरूसित सदनको गरिमा बनाएर राख्दै चर्चालाई सार्थक र परिणामोन्मुख बनाउने प्रयास गर्ने आह्वान गरे।

गृह मन्त्रीले स्वतन्त्र भारतका पहिलो भारतीय केन्द्रिय विधानसभा अध्यक्ष रहेका विट्ठल भाई पटेलको योगदानलाई पनि विस्तारमा याद गरे। उनले भने, पटेलले विधानसभा अध्यक्ष पदको गरिमालाई नयाँ शिखरहरूमा पुऱ्याए र यस्ता धेरै परम्पराहरू स्थापित गरे, जुन आजपनि लोकतान्त्रिक संस्थाहरूको आधारशिला हो। शाहले सुझाउ दिए, विट्ठल भाई पटेलका भाषणहरू र योगदानको संकलन देशभरिका विधानसभाहरूको लाइब्रेरीमा उपलब्ध गराइयोस् ताकि नयाँ पीढ़ीको जनप्रतिनिधिले त्यसबाट प्रेरणा लिन सकुन्।

गृह मन्त्रीले भने, भारतको लोकतन्त्र गहिरो एतिहासिक र सांस्कृतिक मूल्यहरूसित जोड़िएको छ। उनले हस्तिनापुरको सभाको उदाहरण दिँदै भने, प्राचीन कालदेखिकै भारतमा जनमतलाई महत्व दिने परम्परा रहिआएको छ। अध्यक्ष केवल सदनको संरक्षक नभएर सेवक पनि हुन्छन् र उनको विवेकपूर्ण निर्णयले नै लोकतन्त्रलाई बल प्रदान गर्दछ।

यस अवसरमा दिल्लीकी मुख्यमन्त्री रेखा गुप्ता, संसदीय कार्य मन्त्री किरेन रिजिजू, दिल्ली विधानसभा अध्यक्ष विजेन्द्र गुप्ता र उपराज्यपाल वीके सक्सेना सहित देशभरिका विधानसभाहरू र विधान परिषदहरूका अध्यक्ष एवं उपाध्यक्ष उपस्थित थिए। कार्यक्रममा दिल्ली विधानसभामा विट्ठल भाई पटेलको जीवनमाथि आधारित प्रदर्शनीको पनि अवलोकन गरियो।

हिन्दुस्थान समाचार / भवानी थामी