गान्तोक, 07 अगस्त (हि.स.)। सिक्किमका लोकसभा सांसद डा. इन्द्रहाङ सुब्बाले भारत सरकारको महिला तथा बाल विकास राज्यमन्त्री सावित्री ठाकुरलाई भेटेर सिक्किमको ग्रामीण, जनजाति र उच्च-उचाइ क्षेत्रहरूमा आङ्गनवाडी केन्द्रहरू (एडब्ल्युसी) को पूर्वाधार सुधार गर्न तत्काल कारबाही गर्न आह्वान गरेका छन्। उनले केन्द्रिय राज्यमन्त्रीलाई ज्ञापन पत्र पनि बझाएका छन्।
सांसद सुब्बाले आफ्नो पत्रमा एकीकृत बाल विकास सेवा (आईसीडीएस) योजना अन्तर्गत आङ्गनवाडी केन्द्रहरूले प्रारम्भिक बाल्यकाल शिक्षा, पोषण र मातृ स्वास्थ्य सहयोग प्रदान गर्न खेल्ने महत्त्वपूर्ण भूमिकालाई जोड दिए। उनले विशेष गरी सिक्किम जस्ता भौगोलिक रूपमा चुनौतीपूर्ण क्षेत्रहरूमा बालमैत्री कक्षाकोठा, सुरक्षित भान्सा, कार्यात्मक शौचालय र सुरक्षित सीमा पर्खाल जस्ता आवश्यक सुविधाहरूको अभाव भएका अस्थायी वा निम्नस्तरीय संरचनाहरूबाट सञ्चालन भइरहेको जानकारी गराए।
सांसद सुब्बाले आङ्गनवाडी केन्द्र निर्माणको लागि हालको एकाइ लागत मापदण्डको अपर्याप्ततामा पनि चिन्ता व्यक्त गरे। उनले उल्लेखनीय रूपमा उच्च निर्माण र यातायात लागत एवं सीमित कार्य मौसमका कारण पहाडी भूभागमा टिकाउ, जलवायु-प्रतिरोधी संरचनाहरू निर्माण गर्न विद्यमान बजेट विनियोजन अपर्याप्त रहेको बताए। उनले बालबालिका र आङ्गनवाडी कार्यकर्ताहरूको आवश्यकताहरू पूरा गर्ने गुणस्तरीय पूर्वाधार विकासलाई सक्षम बनाउन एकाइ लागत मापदण्डहरू परिमार्जन गर्न तत्काल आवश्यकतामा जोड दिएका छन्।
सांसद सुब्बाले चुनिएका स्थानहरूमा आदर्श आङ्गनवाडी केन्द्रहरू स्थापना गर्ने सिक्किम सरकारको प्रयासको प्रशंसा गर्दै यस्ता पहलहरूको विस्तारलाई समर्थन गर्न आग्रह गरे। उनले मन्त्रीको नेतृत्वमा मन्त्रालयले देशका प्रत्येक बालबालिकालाई सुरक्षित, समावेशी र सुसज्जित प्रारम्भिक बाल्यकाल हेरचाह सुविधाहरूमा पहुँच सुनिश्चित गर्न आवश्यक कदम चाल्नेछ भनी विश्वास व्यक्त गरेका छन्।
हिन्दुस्थान समाचार / बिशाल
