गान्तोक, 06 सेप्टेम्बर (हि.स.)। मुख्यमन्त्री प्रेमसिंह तामाङले पाङ ल्हाबसोल पर्वको शुभ अवसरमा राज्यवासीहरूमा हार्दिक बधाई एवं शुभकामना व्यक्त गरेका छन्।
मुख्यमन्त्री आफ्नो सन्देशमा यो अद्वितीय पर्वले हाम्रो सांस्कृतिक र आध्यात्मिक सम्पदामा विशेष स्थान राख्छ, किनकि यो पर्व सिक्किमको संरक्षक देवताको रूपमा कञ्चनजङ्घको अभिषेकको स्मरणोत्सव रहेको बताएका छन्। उनले यो पर्व काबी लुङचोकमा मनाइने लेप्चा र भोटिया समुदायहरूबीचको ऐतिहासिक भ्रातृत्वको सम्बन्धको पनि प्रतीक रहेको बताएका छन्।
मुख्यमन्त्रीले यस पवित्र अवसरमा सिक्किमका आदरणीय संरक्षक देवतालाई सिक्किमको शान्ति, एकता र सद्भावको लागि प्रार्थना गरेका छन्। उनले हामी प्रगति र समृद्धिको मार्गमा अग्रसर बनिरहौं र राज्यका जनता खुशी, प्रशस्तता र कल्याणले सम्पन्न बनिरहुन् भनी कामना पनि गरेका छन्।
हिन्दुस्थान समाचार / बिशाल
