बेलायत, 17 जनवरी (हि.स.)। इङ्ग्ल्याण्ड फुटबल एसोसिएशन (एफए) ले नस्लवादी टिप्पणी गरेको आरोपमा लिभरपुलकी गोलकिपर राफाएला बोर्गग्राफेमाथि छ खेलको प्रतिबन्ध लगाएको छ। लिभरपुलका मुख्य प्रशिक्षक ग्यारेथ टेलरले शुक्रबार यसको पुष्टि गर्दै खेलाडीले प्रतिबन्धअन्तर्गतका पाँच खेल पहिले नै भोगिसकेको जानकारी दिए।
ब्रिटिश सञ्चारमाध्यमका अनुसार, एफएले सेप्टेम्बर महिनामा बोर्गग्राफेविरुद्ध अनुसन्धान सुरु गरेको थियो। उनीमाथि आफ्नै टोलीकी एक खेलाडीप्रति आपत्तिजनक तथा विभेदपूर्ण भाषा प्रयोग गरेको आरोप लागेको थियो, तर उक्त खेलाडीको पहिचान सार्वजनिक गरिएको छैन।
आइतबार टोटेनहम हट्स्परविरुद्ध हुने विमेन्स सुपर लिग खेलअघि सञ्चारकर्मीहरूसँग कुरा गर्दै प्रशिक्षक टेलरले भने, “अब यस प्रकरणमा स्पष्टता आएको छ। एफएले विस्तृत अनुसन्धान पूरा गरी खेलाडीमाथि छ खेलको प्रतिबन्ध लगाएको छ। प्रतिबन्ध लागू भएको अवधिमा उनले अधिकांश खेल गुमाइसकेकी छन्, त्यसैले यो सप्ताहन्तमा उनी छनोटका लागि उपलब्ध हुनेछैनन्। त्यसपछि भने उनी छनोटका लागि उपलब्ध हुनेछिन्।”
उनले थपे, “अब यो विषय टुंगिएकोमा हामी सन्तुष्ट छौँ। सबैका लागि अवस्था स्पष्ट भएको छ र हामी यस घटनाबाट अघि बढ्न सक्छौँ।”
२५ वर्षीया राफाएला बोर्गग्राफे जुलाई महिनामा लिभरपुलमा आवद्ध भएकी थिइन् र अहिलेसम्म विमेन्स सुपर लिगमा टोलीका लागि तीन खेल खेलिसकेकी छन्। हाल लिभरपुल टोली लिग तालिकाको तल्लो स्थानमा रहेको छ।
हिन्दुस्थान समाचार / भवानी थामी
