कोलकाता, 12 अक्टोबर (हि.स.)। दुर्गा पूजाको ठिक अगाड़ि प्रवर्तन निदेशालय (ईडी) ले कोलकातामा वित्तीय ठगी एवं मनी लाण्ड्रिङ्गको एउटा पुरानो मामिलामा आफ्नो अनुसन्धानलाई तीव्रता दिएको छ। केन्द्रिय जाँच एजेन्सीका अधिकारीहरूले सोमवार बिहान महानगरका विभिन्न क्षेत्रहरूमा एकैसाथ छापामारी शुरू गरे। टलीगञ्ज र शरत बोस रोड सहित आठ वटा विभिन्न स्थानहरूमा खोजी अभियान भइरहेको छ। यो कारबाही एक चिट फण्ड कम्पनीले आम लगानीकर्ताहरूलाई उच्च मुनाफाको प्रलोभन दिएर करोडौँ रुपियाँको ठगी गरेको आरोपसँग सम्बन्धित छ।

जाँचसित जोड़िएको सूत्र अनुसार ईडीले 'अमृत प्रोजेक्ट लिमिटेड' नामक कम्पनीको वित्तीय अनियमितताहरूको गहन अनुसन्धान गरिरहेको छ। आरोप छ, कम्पनीले सर्वसाधारणलाई आकर्षक फिर्ताको प्रलोभन दिएर ठूलो रकम जुटायो अनि पछि नियमहरूको उल्लङ्घन गर्दै उक्त धनलाई विभिन्न रियल एस्टेट तथा विभिन्न निर्माण व्यवसायहरूमा डायभर्ट गऱ्यो। यद्यपि एजेन्सीले अहिलेसम्म यस मामिलामा प्रत्यक्ष रूपमा संलग्न व्यक्तिहरूको नाम औपचारिक रूपमा खुलासा गरेको छैन।

स्मरणीय छ, यसै मामिलामा ईडीले पछिल्लो सेप्टेम्बर महिनामा कोलकाता र इन्दौरका 17 वटा स्थानमा संयुक्त छापामारी गरेको थियो। त्यस अवधि कोलकाताको नारकेलडाङ्गा, नेताजी नगर, सदर्न एभेन्यु र बेलेघाटा जस्ता क्षेत्रहरूबाट करिब 75 करोड रुपियाँको अचल सम्पत्ति, 01 करोड रुपियाँ नगद, 4800 अमेरिकी डलर तथा लगभग 20 करोड़ रुपियाँको बेनामी सम्पत्तिमा लगानी गरेका कागज-पत्रहरू जफत गरिएको थियो। चाड़पर्वको मुखैमा सोमवार आठ वटा स्थानमा अचानक भएको यस कारबाहीले शहरको व्यापारिक जगतमा खैलाबैला मचाएको छ।

/ बिशाल