नयाँ दिल्ली, १४ अक्टोबर (हि.स.)। उत्तर प्रदेशकी उच्च शिक्षा राज्यमन्त्री रजनी तिवारीले राज्य सरकारले उच्च शिक्षालाई अझ पारदर्शी, प्रविधिमा आधारित तथा रोजगारमुखी बनाउने दिशामा निरन्तर काम गरिरहेको बताएकी छन्। उनले राज्यमा नकल माफियामाथि प्रभावकारी नियन्त्रण गरिएको, विश्वविद्यालय तथा महाविद्यालयहरूमा राष्ट्रिय शिक्षा नीति २०२० अनुरूप परिवर्तन भइरहेको र मेधावी छात्राहरूलाई निःशुल्क स्कुटी प्रदान गर्ने योजनामा तीव्र गतिमा काम भइरहेको बताइन्।

उत्तर प्रदेशकी उच्च शिक्षा राज्यमन्त्री तथा हरदोई जिल्लाको शाहाबाद विधानसभा क्षेत्रकी विधायक रजनी तिवारीले हिन्दुस्थान समाचारलाई दिएको अन्तर्वार्तामा उच्च शिक्षामा सुधार, छात्राहरूको शिक्षा, रिक्त पदहरूमा नियुक्ति, विपक्षी दलहरूको राजनीति तथा शाहाबादको विकास कार्यबारे विस्तृत रूपमा कुराकानी गरिन्। उनले विश्वविद्यालय नभएका मण्डलहरूमा विश्वविद्यालय स्थापना गरिएको दाबी गर्दै यसबाट छात्राहरूलाई उच्च शिक्षा हासिल गर्न टाढा जानुपर्ने बाध्यता कम भएको बताइन्।

उच्च शिक्षा संस्थानहरूमा रिक्त पदहरूमा नियुक्तिबारे सोधिएको प्रश्नको जवाफमा उनले सरकारले पारदर्शी प्रक्रियामार्फत ठूलो सङ्ख्यामा नियुक्ति गरेको बताइन्। बाँकी रिक्त पदहरूमा नियुक्ति गर्ने प्रक्रिया पनि जारी रहेको उनले जानकारी दिइन्। राष्ट्रिय शिक्षा नीति २०२० को उद्देश्य शिक्षालाई भारतीय संस्कृति र आधुनिक प्रविधिसँग जोड्नुका साथै युवाहरूका लागि रोजगारीका अवसर बढाउनु रहेको उनले बताइन्।

उनले महाविद्यालयहरूमा डिजिटल पुस्तकालय तथा डिजिटल पार्क स्थापना गरिएको जानकारी दिइन्। ग्रामीण क्षेत्रका महाविद्यालयहरूलाई आधुनिक सुविधासम्पन्न बनाउन बजेट बढाइँदै गरेको बताउँदै उनले आधुनिक प्रविधि प्रत्येक विद्यार्थीसम्म पुर्‍याउनु सरकारको लक्ष्य रहेको उल्लेख गरिन्।

उनका अनुसार, अघिल्ला सरकारहरूको कार्यकालमा नकललाई राजनीतिक संरक्षण प्राप्त हुने गरेको थियो। तर, प्रधानमन्त्री नरेन्द्र मोदी र मुख्यमन्त्री योगी आदित्यनाथको नेतृत्वमा व्यवस्थामा परिवर्तन आएको उनले बताइन्। राज्यमा उच्च शिक्षासम्बन्धी परीक्षाहरू अहिले पारदर्शी तथा नकलरहित रूपमा सञ्चालन भइरहेको दाबी गर्दै उनले यसबाट युवाहरूको विश्वास बढेको र उनीहरूलाई विश्वव्यापी प्रतिस्पर्धाका लागि तयार पारिँदै गरेको बताइन्।

उनले कानुन व्यवस्थामा सुधार तथा सरकारी योजनाहरूका कारण छात्राहरूले बीचैमा पढाइ छाड्ने दर घटेको बताइन्। छात्राहरूलाई ट्याब्लेट तथा स्मार्टफोन वितरण गरिएको जानकारी दिँदै उनले मेधावी छात्राहरूलाई स्कुटी प्रदान गर्ने योजनामा पनि काम भइरहेको बताइन्। महिला डिग्री महाविद्यालय तथा सरकारी महाविद्यालय स्थापना गरेर छात्राहरूका लागि उच्च शिक्षाका अवसर विस्तार गरिएको उनले उल्लेख गरिन्।

उच्च शिक्षा विभागले विद्यार्थीहरूले पढाइ छाड्नुका कारणबारे निगरानी गरिरहेको पनि उनले बताइन्। यदि कुनै विद्यार्थीले कक्षा १२ उत्तीर्ण गरेपछि उच्च शिक्षामा भर्ना लिँदैन वा प्रथम वर्षपछि पढाइ छाड्छ भने त्यसका कारणहरूको अध्ययन गरी समाधान खोज्ने काम भइरहेको उनले जानकारी दिइन्।

महिला आरक्षणको मुद्दामा उनले विपक्षी दलहरूको आलोचना गरिन्। संसदमा नारी शक्ति वन्दन अधिनियममाथि भएको छलफलका क्रममा विपक्षी दलहरूको दोहोरो चरित्र उजागर भएको उनले बताइन्। महिलाहरूले अब विपक्षी दलहरूको राजनीति र उनीहरूको वास्तविक दृष्टिकोण बुझ्न थालेको उनको भनाइ थियो।

समाजवादी पार्टीको पीडीए सूत्रबारे टिप्पणी गर्दै उनले विपक्षीसँग स्पष्ट विचारधारा, नीति तथा दृष्टिकोण नरहेको आरोप लगाइन्। भारतीय जनता पार्टीले कुनै भेदभाव नगरी सबै वर्गका लागि काम गरिरहेको दाबी गर्दै उनले जनताले अब नारामा आधारित राजनीतिभन्दा माथि उठेर सोच्न थालेको बताइन्।

हिन्दुस्थान समाचार / बिशाल