चण्डीगढ, 15 अक्टोबर (हि.स.)। पञ्जाबमा लागुऔषध विरोधी कार्यकर्ता परविन्दर सिंह झोटाको हत्याको विरोधमा बिहीबार बिहान 6 बजी पन्जाब बन्द शुरु भएको छ। झोटाको परिवारले आह्वान गरेको बन्दलाई किसान सङ्गठन, राजनीतिक दल र ट्रेड युनियनको समर्थन प्राप्त भएको छ। धेरै ठाउँमा प्रदर्शनकारीहरूले सडक अवरुद्ध गरे र राज्य सरकारका विरुद्ध नारा लगाए। बन्द साँझ 5 बजीसम्म जारी रहने घोषणा गरिएको छ।
झोटाका बुबा भीम सिंह, एक पूर्व सैनिक, ले बिहान मानिसहरूलाई सडकमा उत्रेर बन्दलाई सफल बनाउन अपील गरे। केही क्षेत्रमा वर्षा र असिना परेको भए पनि मानिसहरूले आन्दोलनमा सामेल भएर लागुऔषधविरुद्ध आवाज उठाउनुपर्ने उनले बताए। बन्दको समयमा एम्बुलेन्स र अन्य आपतकालीन सवारी साधनहरूलाई बाटो दिइरहेको प्रदर्शनकारीहरूले स्पष्ट पारे। धेरै निजी शैक्षिक संस्थानहरूले पनि बिहीबार बिदाको घोषणा गरेका छन्। तर, मालवाका केही जिल्लामा बिहान 8 बजीतिर बन्दको प्रभाव सीमित देखिएको छ।
अमृतसरमा किसान मजदुर संघर्ष समितिको नेतृत्वमा किसान र विभिन्न सङ्गठनका सदस्यहरूले बिहान 7 बजीतिर गोल्डेन गेटमा प्रदर्शन गरे। भारी वर्षाका बावजुद प्रदर्शनकारीहरूले मुख्यमन्त्री भगवन्त मानको नेतृत्वमा रहेको पञ्जाब सरकारको विरोधमा नारा लगाए र मुख्यमन्त्रीको पुतला जलाए। राज्य सरकार लागुऔषधको व्यापार रोक्न र युवाहरूलाई लागुऔषधबाट जोगाउन असफल भएको किसान नेताहरूले आरोप लगाएका छन्। उनीहरूले झोटाको हत्याको मुद्दा उठाए र मुख्यमन्त्रीको राजीनामा माग गरे।
भटिंडा जिल्लाको रामपुरा फुल चोकको मौर चोक नजिकै राजमार्ग अवरुद्ध गर्न खोजिरहेका केही प्रदर्शनकारीलाई पुलिसले हिरासतमा लिने प्रयास गरेको थियो। प्रदर्शनकारीहरूले पहिले मन्डी कलां मण्डीमा भेला हुने र त्यसपछि फेरि सडक अवरुद्ध गर्ने बताएका छन्। विभिन्न स्थानमा प्रदर्शनकारीहरूको गतिविधिको बिचमा पुलिस र प्रशासनले अवस्थाको निगरानी गरिरहेको छ।
परविन्दर सिंह झोटाको शव मान्साको सिभिल अस्पतालमा राखिएको छ। पारिवारिक सहमति नभएको कारण अहिलेसम्म पोस्टमार्टम हुन सकेको छैन। यस मामिलामा न्याय पाउन गठन गरिएको परिवार र कार्य समितिले पीजीआई, चण्डीगढका डाक्टरहरूको प्यानलद्वारा पोस्टमार्टम गर्न माग गरेको छ। कार्य समितिले बन्दको समयमा शान्ति कायम गर्न र संयम अपनाउन जनतालाई अपील गरेको छ। यसले प्रशासनलाई कानुन हातमा लिने जो कोहीविरुद्ध कडा कारबाही गर्न पनि आग्रह गरेको छ।
झोटाको परिवार र कार्य समितिले मुख्यमन्त्री भगवन्त मान र पन्जाब पुलिस महानिर्देशक (डिजिपि)को राजीनामा माग गरेको छ। साथै, झोटा हत्याको अनुसन्धान केन्द्रिय अनुसन्धान ब्युरो (सीबीआई) ले गर्नुपर्ने माग गरेको छ। सम्बन्धित जिल्ला लागुऔषध निरीक्षक, एसएसपी, डीएसपी र थाना प्रभारीलाई बर्खास्त गर्नुपर्छ। विरोध प्रदर्शनका सम्बन्धमा हिरासतमा लिइएका व्यक्तिहरूलाई रिहा गर्नुपर्छ। उनीहरूको मुख्य माग राज्यमा लागुऔषधको व्यापार रोक्नु र युवालाई बचाउन प्रभावकारी कदम चाल्नु थियो।
परविन्दर सिंह झोटाको हत्यापछि पञ्जाबमा लागुऔषधको मुद्दा र कानुन र व्यवस्थालाई लिएर राजनीतिक र सामाजिक सङ्गठनहरूको विरोध तीव्र भएको छ। परिवार र समर्थकहरूले यस विषयमा निष्पक्ष जाँच र दोषीहरू विरुद्ध कारबाहीको माग गरिरहेका छन्।
बिहीबार राज्यका विभिन्न भागमा पन्जाब बन्दका क्रममा प्रदर्शन जारी रह्यो। बन्दको प्रभाव क्षेत्रअनुसार भिन्नै थियो, जबकि प्रदर्शनकारीहरूले आपतकालीन सेवाहरूमा बाधा नपार्ने बताएका छन्।
हिन्दुस्थान समाचार / भवानी थामी
