हङकङ, १७ अक्टोबर (हि.स.)। भारतीय अलराउन्डर क्रुणाल पाण्ड्याले ३० अक्टोबरदेखि १ नोभेम्बरसम्म आयोजना हुने हङकङ सिक्सेस २०२६ मा भारतीय टोलीको कप्तानी गर्नेछन्। अनुभवी तीव्र गतिका बलर भुवनेश्वर कुमार न्युजिल्यान्ड भ्रमणका लागि भारतीय टोलीमा छनोट भएपछि उनको स्थानमा गुजरात टाइटन्सका तीव्र गतिका बलर कुलवन्त खेजरोलियालाई सात सदस्यीय टोलीमा समावेश गरिएको छ।
क्रुणालको नेतृत्वमा रहने भारतीय टोलीमा शशाङ्क सिंह, राहुल तेवतिया, नितिश राणा, राहुल त्रिपाठी, टी. नटराजन र कुलवन्त खेजरोलिया रहेका छन्। इन्डियन प्रिमियर लिगमा अनुभव हासिल गरेका खेलाडीहरू सम्मिलित यस टोलीमा ब्याटिङ र अलराउन्ड प्रदर्शनका विभिन्न विकल्प उपलब्ध छन्। छ खेलाडी सहभागी हुने यस तीव्र गतिको प्रतियोगितामा भारतीय टोलीले यिनै खेलाडीको प्रदर्शनका आधारमा प्रतिस्पर्धा गर्नेछ।
भुवनेश्वर कुमारको भारतीय राष्ट्रिय टोलीमा पुनरागमन उनको खेलजीवनका दृष्टिले महत्त्वपूर्ण रहेको छ। करिब चार वर्षपछि उनले राष्ट्रिय टोलीमा स्थान पाएका हुन्। २२ अक्टोबरदेखि सुरु हुने न्युजिल्यान्ड भ्रमणका लागि छनोट भएकाले उनले हङकङ सिक्सेसमा खेल्न पाउने छैनन्। उनको अनुपस्थितिमा टोलीको कप्तानीको जिम्मेवारी क्रुणाललाई सुम्पिएको छ।
भुवनेश्वरलाई न्युजिल्यान्डविरुद्धको पाँच खेलको टी२० अन्तरराष्ट्रिय शृङ्खलाका लागि भारतीय टोलीमा समावेश गरिएको छ। यसका अतिरिक्त, वेस्ट इन्डिजविरुद्धको चौथो टी२० अन्तरराष्ट्रिय खेलमा अर्शदीप सिंह घाइते भएपछि शनिबार हुने पाँचौँ तथा अन्तिम टी२० खेलका लागि पनि उनलाई भारतीय टोलीमा स्थान दिइएको छ।
क्रिकेट हङकङ, चीनका वाणिज्य तथा विपणन निर्देशक अनुराग भटनागरले भने, “हङकङ सिक्सेस २०२६ मा भुवनेश्वर कुमारको अनुपस्थिति अवश्य खट्किनेछ। तर, उनले राष्ट्रिय टोलीमा पुनरागमन गर्ने अवसर पाएकोमा हामी खुसी छौँ। चार वर्षपछि अन्तरराष्ट्रिय क्रिकेटमा उनको पुनरागमन विशेष उपलब्धि हो। हामी उनलाई न्युजिल्यान्ड भ्रमणका लागि शुभकामना दिन्छौँ। भविष्यमा उनी फेरि हङकङ सिक्सेसमा खेल्न आउनेछन् भन्ने आशा गरेका छौँ।”
हिन्दुस्थान समाचार / बिशाल
