- पुणे-जयपुर एक्सप्रेसको जनरल कोचबाट पक्राउ परेका अभियुक्तहरू नेपाल भाग्न खोजिरहेका थिए

कोटा, १९ अक्टोबर (हि.स.)। बलिउड अभिनेता टाइगर श्रफको गाडीलाई निशाना बनाएर मुम्बईको जुहू क्षेत्रमा गोली प्रहार गरिएको घटनामा तीन जना संदिग्धलाई नियन्त्रणमा लिइएको छ। उनीहरूमध्ये एक जना नाबालिग पनि छन्। तीनै जनालाई कोटा रेलवे स्टेसनमा पुणे-जयपुर एक्सप्रेसको साधारण डिब्बाबाट पक्राउ गरिएको हो। उनीहरू साधारण डिब्बामा अलग-अलग स्थानमा बसेका थिए। रेलबाट जयपुर पुगेपछि बसमार्फत दिल्ली जाने र त्यहाँबाट नेपाल भाग्ने उनीहरूको योजना रहेको बताइएको छ।

वरिष्ठ मण्डल वाणिज्य प्रबन्धक सौरभ जैनका अनुसार मुम्बई पुलिस तथा सम्बन्धित जाँच निकायबाट प्राप्त प्राविधिक सूचना र गुप्तचर जानकारीका आधारमा रेलवे सुरक्षा बल (आरपीएफ) र कोटा शहर पुलिसको संयुक्त टोलीले तत्काल कारबाही गरेको थियो। संदिग्धहरू विदेश भाग्न सक्ने आशङ्काका बीच टोलीले उनीहरूलाई रेलबाट अगाडि जानुअघि नै नियन्त्रणमा लिएको हो।

नियन्त्रणमा लिइएका संदिग्धहरूको पहिचान हरियाणाको सोनीपत निवासी रेहान उर्फ सुक्का (१८ वर्ष) र बिहार निवासी तथा हाल मुम्बईको अन्धेरी पश्चिममा बस्दै आएका ऋत्विक कुर्मी उर्फ रोशन फाइटर (२२ वर्ष) का रूपमा गरिएको छ। तेस्रो संदिग्ध नाबालिग रहेकाले कानुनी प्रावधानअनुसार उनको पहिचान गोप्य राखिएको छ।

कोटा एसपी तेजस्विनी गौतमले मुम्बई पुलिसबाट आरोपीहरूबारे सूचना प्राप्त भएपछि सम्पूर्ण टोली सक्रिय भएको बताइन्। उनले १५ मिनेटभित्रै पूरै रेलमा खोजी गरिएको जानकारी दिइन्। उनका अनुसार, रेहान उर्फ सुक्का, ऋत्विक कुर्मी उर्फ रोशन र एक नाबालिगलाई आज बिहान १० बजेर १८ मिनेटमा कोटाबाट पक्राउ गरिएको हो।

तीनै जना लरेन्स गिरोहसँग सम्बन्धित रहेको पुलिसको भनाइ छ। रेहान लरेन्स गिरोहका अनिल पण्डितको सम्पर्कमा रहेको बताइएको छ। उसैले सोनीपतका एक नाबालिगलाई आफ्नो योजनामा सहभागी गराएको पुलिसको भनाइ छ। बिहारका निवासी ऋत्विक र्‍यापिडो चलाउँछन् र मुम्बईको अन्धेरी पश्चिममा बस्छन्। हरियाणाका रेहान र नाबालिग भने मजदुरी गर्ने गरेको बताइएको छ।

पुलिसका अनुसार, उनीहरूबाट हतियार बरामद भएको छैन। घटनापछि नै उनीहरू त्यहाँबाट निस्किएका थिए।

कोटा शहरकी एसपीले तीनै जना नेपाल भाग्ने तयारीमा रहेको बताइन्। अब उनीहरूलाई मुम्बई पुलिसको जिम्मा लगाइनेछ। मुम्बई पुलिसले आरोपीहरूको खोजी गरिरहेको थियो र यसबारे कोटा पुलिसलाई सूचना दिएको थियो। उत्तर प्रदेशको नम्बर प्लेट भएको गाडीमा मुम्बई पुलिसका तीन जना अधिकारी कोटा पुगेका छन्।

उल्लेखनीय छ, अभिनेता टाइगर श्रफ आइतबार साँझ सात बजी आफ्नो गाडीमा जुहूस्थित पुष्पा पार्कबाट निस्कँदै थिए। उनी अगाडिको सिटमा बसेका थिए भने चालकले गाडी चलाइरहेका थिए। त्यही बेला तीन जनाले उनको गाडीमाथि लगातार पाँच राउन्ड गोली प्रहार गरेका थिए। घटनामा टाइगरका चालक र अर्का एक व्यक्ति घाइते भए। टाइगरले चालकलाई लिएर अस्पताल पुगेका थिए।

पछि लरेन्स गिरोहले गोली प्रहारको जिम्मेवारी लिएको थियो। पुलिसका अनुसार, टाइगरलाई गोली लागेको थिएन, तर उनको बायाँ हातमा बारुद र सिसाका टुक्राका कारण चोट लागेको थियो।

हिन्दुस्थान समाचार / बिशाल