उज्जैन, १९ अक्टोबर (हि.स.)। मध्य प्रदेशको उज्जैनस्थित विश्वप्रसिद्ध श्री महाकालेश्वर मन्दिरमा सोमबार बिहान भस्म आरतीका क्रममा भगवान महाकाललाई देवीको स्वरूपमा विशेष शृङ्गार गरियो। आश्विन शुक्ल नवमीको अवसरमा बाबा महाकाललाई चाँदीका आभूषण, रजत मुकुट र मुण्डमाला पहिर्याइएको थियो। भगवानलाई मोगरा र गुलाबका सुगन्धित फूलले सजाइएको थियो। दिव्य शृङ्गारमा सजिएका बाबा महाकालको दर्शन गर्न ठूलो सङ्ख्यामा भक्तजन मन्दिरमा भेला भएका थिए। आरतीपछि भगवानलाई फलफूल र मिठाईको भोग अर्पण गरिएको थियो।
सोमबार बिहान ४ बजी मन्दिरको ढोका खुल्नेबित्तिकै पुजारीहरूले गर्भगृहमा स्थापित देवीदेवताको पूजा गरेका थिए। त्यसपछि भगवान महाकालको जलाभिषेक गरिएको थियो। दूध, दही, घिउ, मह, चिनी र फलफूलको रसबाट तयार पारिएको पञ्चामृत तथा वैदिक मन्त्रका साथ अभिषेक गरी पूजा सम्पन्न गरिएको थियो।
पूजापछि घण्टीको नादसँगै मन्त्र उच्चारण गर्दै भगवानको ध्यान गरिएको थियो र हरिओम जल अर्पण गरिएको थियो। कपुर आरतीपछि भगवानको शिरमा भाङ, चन्दन र त्रिपुण्ड लगाइयो। त्यसपछि ज्योतिर्लिङ्गलाई वस्त्रले ढाकेर भस्म अर्पण गरियो। भस्म आरतीका क्रममा महानिर्वाणी अखाडाले भगवान महाकाललाई भस्म अर्पण गरेको थियो। धार्मिक मान्यताअनुसार, भस्म अर्पणपछि भगवानले भक्तजनलाई निराकारबाट साकार स्वरूपमा दर्शन दिनुहुन्छ।
भस्म अर्पणपछि भगवान महाकाललाई शेषनागको चाँदीको मुकुट, चाँदीको शिरपेच र रुद्राक्षको माला पहिर्याइएको थियो। साथै, सुगन्धित फूलका मालासहित मोगरा र गुलाबका फूल अर्पण गरिएको थियो। आभूषण र फूलले सजिएका बाबा महाकालको दर्शन गरेर भक्तजन हर्षित भएका थिए। भस्म आरतीका क्रममा मन्दिर परिसर बाबा महाकालका मन्त्रले गुञ्जायमान भएको थियो। आरतीमा सहभागी भक्तजनले बाबा महाकालको दर्शन गरी आशीर्वाद लिएका थिए। भक्तजनले नन्दी महाराजको दर्शन गर्नुका साथै उनको कानमा आफ्ना मनोकामना पनि व्यक्त गरेका थिए।
हिन्दुस्थान समाचार / भवानी थामी
