अमरावती, 0२ अक्टोबर (हि.स.)। महाराष्ट्रमा नवरात्रि उत्सवका लागि दुर्गा माताको मूर्ति लिएर फर्किरहेका युवाहरू सवार पिकअप गाडी समृद्धि महामार्गमा भीषण दुर्घटनामा परेको छ। अमरावती जिल्लाको धामणगाउँ पुलिस थाना क्षेत्रअन्तर्गत शुक्रबार राति करिब १ बजी दुर्घटना भएको जानकारी आएको छ। दुर्घटनामा पाँच जनाको मृत्यु भएको छ भने केही व्यक्ति घाइते भएको बताइएको छ।
प्राप्त जानकारीअनुसार, वर्धाको सिन्दी मेघे क्षेत्रस्थित नवदुर्गा पूजा उत्सव समितिका सदस्यहरू हरेक वर्षझैँ यस वर्ष पनि शेगाउँबाट दुर्गा माताको अग्लो मूर्ति पिकअप गाडीमा लिएर फर्किरहेका थिए। धामणगाउँनजिक समृद्धि महामार्गको च्यानल नम्बर ९७ आसपास उनीहरूको गाडीलाई पछाडिबाट आउँदै गरेको एउटा कन्टेनरले तीव्र गतिमा ठक्कर दियो।
ठक्कर यति भीषण थियो कि गाडीमा सवार केही युवक गम्भीर रूपमा घाइते भए। दुर्घटनाको जानकारी पाएलगत्तै पुलिसले घटनास्थलमा पुगेर उद्धार तथा राहत कार्य शुरु गर्दै घाइतेहरूलाई तत्काल अस्पताल पुर्यायो। घाइतेहरूको उपचार वर्धास्थित सावंगी अस्पतालमा भइरहेको छ।
यस दुर्घटनामा घनश्याम पाटील, ओम गावण्डे, सचिन बादमनवार, प्रवीण बाकणे र दत्ता कुलसंगेको मृत्यु भएको प्रारम्भिक जानकारी प्राप्त भएको छ। घटनाको जानकारी पाएपछि पुलिस अधिकारी तथा स्थानीय प्रशासनका अधिकारीहरूले घटनास्थलका साथै अस्पताल पुगेर अवस्थाको जायजा लिएका थिए। दुर्घटना हुनुको कारणबारे पुलिसले जॉंच गरिरहेको छ।
हिन्दुस्थान समाचार / भवानी थामी
02 Oct 2026
