गान्तोक, 02 अक्टूबर (हि.स.)। सिक्किम डेमोक्रेटिक फ्रन्ट (एसडीएफ) का अध्यक्ष पवन चाम्लिङले गान्धी जयन्तीको अवसरमा राष्ट्रपिता महात्मा गान्धीप्रति श्रद्धाञ्जली अर्पण गर्दै सत्य, शान्ति र अहिंसाका आदर्शलाई आत्मसात् गर्न आह्वान गरेका छन्।
चाम्लिङले गान्धी जयन्तीका अवसरमा जारी सन्देशमा महात्मा गान्धीको जीवन र दर्शनले विश्वभर सत्य, शान्ति र अहिंसाको मार्गलाई निरन्तर उज्यालो पारिरहेको उल्लेख गरेका छन्।
उनले गान्धीका ‘सत्य’ र ‘अहिंसा’ का सिद्धान्तले नेतृत्व तथा सार्वजनिक जीवनका लागि नैतिक आधार प्रदान गरेको उल्लेख गर्दै ती सिद्धान्त आज पनि उत्तिकै सान्दर्भिक रहेको बताएका छन्।
उनका अनुसार, गान्धीको दर्शन र राजनीतिक कार्यका सिद्धान्तले अमेरिकाको नागरिक अधिकार आन्दोलनदेखि एसिया र अफ्रिकाका औपनिवेशिक शासनविरुद्धका आन्दोलनसम्म विश्वभरका विभिन्न आन्दोलनलाई प्रभावित गरेको छ। गान्धीको दर्शनको विश्वव्यापी सान्दर्भिकतालाई मान्यता दिँदै संयुक्त राष्ट्र महासभाले २००७ मा 2 अक्टोबरलाई अन्तरराष्ट्रिय अहिंसा दिवसका रूपमा घोषणा गरेको पनि उनले उल्लेख गरेका छन्।
चाम्लिङले यस गान्धी जयन्तीमा गान्धीको विचार र शान्ति, न्याय, सत्य तथा मानव मर्यादाप्रतिको उनको स्थायी विरासतबारे मनन गर्न आह्वान गरेका छन्। युद्ध, द्वन्द्व र विभाजनले विश्वलाई प्रभावित गरिरहेको वर्तमान अवस्थामा गान्धीको अहिंसा र मेलमिलापको सन्देश अझ महत्वपूर्ण र सान्दर्भिक बनेको उनले बताएका छन्।
उनले गान्धी जयन्तीको अवसरमा सिक्किमवासीलाई हार्दिक शुभकामना व्यक्त गर्दै महात्मा गान्धीका आदर्शले सत्य, न्याय र दिगो शान्तितर्फको सामूहिक यात्रालाई निरन्तर मार्गदर्शन गरिरहून् भन्ने कामना गरेका छन्।
---------------
हिन्दुस्थान समाचार / बिशाल
02 Oct 2026
