गान्तोक, 21 अक्टोबर (हि.स.)। सिक्किम एथलेटिक्स एसोसिएसन (एसएए) द्वारा छनोट गरिएको १० सदस्यीय सिक्किमको टोली ४१औँ राष्ट्रिय जुनियर एथलेटिक्स च्याम्पियनसिपमा भाग लिन बुधबार चेन्नई प्रस्थान गरेको छ। प्रतियोगिता आगामी २३ देखि २७ अक्टोबर, २०२६ सम्म चेन्नईस्थित जवाहरलाल नेहरू स्टेडियममा आयोजना हुनेछ।
टोलीमा सात जना खेलाडीसहित तीन जना अधिकारी रहेका छन्। प्रतियोगितामा सिक्किमका तीन जना छात्र र चार जना छात्राले १६ वर्षमुनि, १८ वर्षमुनि तथा २० वर्षमुनिका विभिन्न उमेर समूहमा प्रतिस्पर्धा गर्नेछन्।
टोलीको नेतृत्व प्रबन्धक हिसे तेन्जिङ भोटियाले गरेका छन्। टोलीमा प्रशिक्षक आरबी सुब्बा र शारीरिक उपचार विशेषज्ञ डा. अविका टी. कालेओन पनि सहभागी छन्। टोली आज साँझ बागडोगराबाट हवाईमार्ग हुँदै चेन्नई प्रस्थान गर्ने र आजै राति त्यहाँ पुग्ने कार्यक्रम छ। प्रतियोगिता शुरु हुनुअघि २२ अक्टोबरमा आवश्यक दस्तावेजहरूको प्रमाणीकरण गरिने बताइएको छ।
राष्ट्रियस्तरको यस प्रतियोगितामा युवा खेलाडीहरूको सहभागिताले उनीहरूलाई आफ्नो प्रतिभा प्रदर्शन गर्ने, प्रतिस्पर्धात्मक अनुभव हासिल गर्ने तथा राष्ट्रिय मञ्चमा सिक्किमको प्रतिनिधित्व गर्ने महत्त्वपूर्ण अवसर प्रदान गर्नेछ।
सिक्किम एथलेटिक्स एसोसिएसनले राज्यमा एथलेटिक्स खेलको प्रवर्द्धन तथा युवा खेल प्रतिभाको विकासका लागि निरन्तर सहयोग र प्रोत्साहन प्रदान गरेकोमा मुख्यमन्त्री प्रेमसिंह तामाङ र सिक्किम सरकारको खेलकुद तथा युवा मामिला विभागका सचिवप्रति हार्दिक आभार व्यक्त गरेको छ। राष्ट्रियस्तरका प्रतियोगिताहरूमा खेलाडीहरूको सहभागिता सुनिश्चित गर्न तथा उनीहरूलाई खेल क्षेत्रमा उत्कृष्टता हासिल गर्न यस्तो सहयोग महत्त्वपूर्ण रहेको एसोसिएसनले जनाएको छ।
टोली आगामी २८ अक्टोबर, २०२६ मा सिक्किम फर्कने कार्यक्रम रहेको छ।
---------------
हिन्दुस्थान समाचार / बिशाल
