रायपुर, २२ अक्टोबर (हि.स.)। राष्ट्रपति द्रौपदी मुर्मुले बिहिवार लोकभवन स्थित छत्तीसगढ़ मण्डपममा माता हासी देवीको सम्मानमा २०० रुपियाँको स्मारक सिक्का जारी गरिन्। यस अवसरमा राज्यपाल रमेन डेका र मुख्यमन्त्री विष्णु देव साय लगायत उपस्थित थिए।

रायपुर स्थित शदाणी दरबारकी पाँचौँ पीठाधीश माता साहिब हासी देवीको २००औँ जयन्तीका अवसरमा स्मारक सिक्काका साथै विशेष हुलाक टिकट पनि जारी गरिएको हो।

सिन्धी समुदायकी विभूतिप्रति सम्मानस्वरूप स्मारक सिक्का जारी हुनु समुदायका लागि ऐतिहासिक अवसर भएको बताइएको छ। यसले देश तथा विदेशमा रहेका करोडौं सिन्धी समुदायका मानिसहरूमा गौरवको भावना जगाएको छ। सिक्काको अनावरणपछि श्रद्धालु तथा सिक्का सङ्कलकहरूले शदाणी दरबारका विभिन्न शाखा मार्फत यसको बुकिङ गर्न सक्नेछन्।

भारत सरकारद्वारा जारी गरिएको यस विशेष सिक्कामा माता हासी देवीको तस्बिर अङ्कित छ। सिक्काको एकातर्फ अशोक स्तम्भको सिंहशीर्ष र २०० रुपियाँको मूल्यवर्ग उल्लेख गरिएको छ। यस स्मारक सिक्का मार्फत माता हासी देवीको जीवन, विचार तथा आध्यात्मिक योगदानलाई भावी पुस्तासम्म पुर्याउने प्रयास गरिएको छ।

कार्यक्रममा शदाणी दरबार रायपुरका पीठाधीश सन्त डा. युधिष्ठिर लालले स्वागत मन्तव्य व्यक्त गरे।

यस अवसरमा राज्यकी प्रथम महिला रानी डेका काकोटी, सांसद बृजमोहन अग्रवाल, विधायक पुरन्दर मिश्रा, सुनील सोनी, मोतीलाल साहू, मुख्य सचिव विकासशील, पुलिस महानिदेशक अरुण देव गौतम, राज्यपालका सचिव डा. सी. आर. प्रसन्ना लगायत वरिष्ठ अधिकारी, शदाणी दरबारका सदस्य तथा देशभरिबाट आएका जनप्रतिनिधि र सिन्धी समुदायका प्रतिनिधिहरू उपस्थित थिए।

हिन्दुस्थान समाचार / भवानी थामी