चेन्नई, ०६ अक्टोबर (हि.स.)। तमिलनाडुको मदुरान्तकम र धारापुरम विधानसभा निर्वाचन क्षेत्रमा उपनिर्वाचनका लागि मंगलबार बिहान ७ बजीदेखि मतदान शुरु भएको छ। अघिल्लो निर्वाचनमा यी दुवै सिटमा विजयी भएका अन्नाद्रमुक (एआईएडीएमके) का उम्मेदवारहरूले निर्वाचित भएको केही समयपछि नै विधानसभा सदस्य पदबाट राजीनामा दिएका थिए।
मतदान केन्द्रहरूमा बिहानैदेखि मतदाताहरूको लामो लाइन देखिएको छ। मतदान साँझ ६ बजीसम्म सञ्चालन हुनेछ। मदुरान्तकममा २८५ तथा धारापुरममा ३२० मतदान केन्द्रमा मतदान भइरहेको छ।
मदुरान्तकम विधानसभा क्षेत्रमा २ लाख १३ हजार ७८८ मतदाता रहेका छन् भने धारापुरम विधानसभा क्षेत्रमा २ लाख २३ हजार ३०६ मतदाता रहेका छन्। मतदान केन्द्रहरूमा कडा सुरक्षा व्यवस्था गरिएको छ। अर्धसैनिक बल तथा तमिलनाडु प्रहरीका सुरक्षाकर्मीहरू मतदान केन्द्रमा सुरक्षा ड्युटीमा खटिएका छन्।
यसअघि करूर, पेरुन्दुरई, विरालीमलै र अम्बासमुद्रमबाट विजयी भएका अन्नाद्रमुकका उम्मेदवारहरूले पनि राजीनामा दिएका थिए। तर, उनीहरूको विजयलाई चुनौती दिँदै उच्च अदालतमा मुद्दा दायर गरिएको थियो। त्यसैगरी तिरुचि पूर्व विधानसभा क्षेत्रबाट टीभीके अध्यक्ष विजयको विजयविरुद्ध पनि याचिका दर्ता गरिएको थियो।
यी मुद्दाहरू विचाराधीन रहेकाले उक्त पाँच विधानसभा क्षेत्रमा उपनिर्वाचन गराउन उच्च अदालतले अन्तरिम रोक लगाएको छ।
हिन्दुस्थान समाचार / भवानी थामी
