पणजी (गोवा), ०८ अक्टोबर (हि.स.)। भारतीय सिनेमाका वरिष्ठ तथा चर्चित अभिनेता नाना पाटेकर अब हामीमाझ रहेनन्। ७५ वर्षको उमेरमा उनले यस संसारबाट बिदा लिएका छन्। दिग्गज अभिनेता नाना पाटेकरको बिहीबार बिहान हृदयाघात भएपछि निधन भएको हो। गोवाको पणजी नजिकै डोना पाउलास्थित आफ्नै अपार्टमेन्टमा अचेत अवस्थामा भेटिएपछि उनलाई निजी अस्पताल (मणिपाल अस्पताल) लगिएको थियो।

दिवंगत अभिनेता नाना पाटेकरका छोरा मल्हार तथा मणिपाल अस्पतालका वरिष्ठ चिकित्सक डा. शेखर सालकरले यसको पुष्टि गरेका छन्। डा. सालकरले उनलाई बचाउन करिब ४५ मिनेटसम्म सीपीआर दिइएको भए पनि बचाउन नसकिएको बताए। क्यान्सर रोग विभागका प्रमुख डा. शेखर सालकरका अनुसार, नाना पाटेकरलाई बिहान करिब ५:१० बजी मृत घोषित गरियो। उनको निधनपछि चिकित्सकीय-कानुनी मामला (एमएलसी) दर्ता गरिएको छ। अब शव परीक्षण गरिनेछ।

नाना हिन्दी र मराठी सिनेमाका चर्चित अभिनेता हुन्। उनको जन्म १ जनवरी, १९५१ मा महाराष्ट्रको रायगढ जिल्लाको मुरुड-जञ्जिरामा भएको थियो। उनी अभिनेता मात्र नभई चलचित्र निर्माता, निर्देशक तथा लेखक पनि थिए। नाना पाटेकरले १९७८ को चलचित्र ‘गमन’ बाट अभिनय यात्रा शुरु गरेका थिए। प्रारम्भिक चरणमा उनले मराठी र हिन्दी दुवै सिनेमामा आफ्नो प्रतिभा प्रस्तुत गरे। १९८८ मा रिलिज भएको मीरा नायरको चलचित्र ‘सलाम बम्बे’ बाट उनको कामले विशेष पहिचान पायो। १९८९ को चर्चित चलचित्र ‘परिन्दा’ उनको करियरको सबैभन्दा ठूलो मोड साबित भयो। यसमा एक ग्याङस्टरको प्रभावशाली भूमिकाका लागि उनलाई राष्ट्रिय चलचित्र पुरस्कार र फिल्मफेयर पुरस्कारबाट सम्मानित गरिएको थियो।

आफ्नो लामो चलचित्र यात्रामा उनले धेरै चुनौतीपूर्ण भूमिकालाई पर्दामा जीवन्त बनाए। ‘अंकुश’, ‘प्रतिघात’, ‘प्रहार’, ‘तिरंगा’, ‘क्रान्तिवीर’, ‘अग्निसाक्षी’, ‘खामोशी: द म्युजिकल’, ‘अब तक छप्पन’, ‘अपहरण’, ‘राजनीति’ जस्ता गम्भीर तथा संवेदनशील चलचित्रका साथै ‘वेलकम’ र ‘वेलकम ब्याक’ जस्ता हास्य चलचित्रमा आफ्नो उत्कृष्ट अभिनयमार्फत उनले आफ्नो बहुमुखी प्रतिभा प्रमाणित गरेका थिए।

हिन्दुस्थान समाचार / भवानी थामी