नयाँ दिल्ली, ०८ अक्टोबर (हि.स.)। चर्चित भारतीय अभिनेता नाना पाटेकरको निधनले चलचित्र तथा राजनीतिक जगत् स्तब्ध बनेको छ। अभिनेता, प्रशंसक तथा राजनीतिक नेताहरूले उनलाई भारतीय सिनेमाको अद्वितीय, निर्भीक तथा संवेदनशील व्यक्तित्वका रूपमा स्मरण गर्दै श्रद्धाञ्जली अर्पण गरेका छन्। प्रधानमन्त्री नरेन्द्र मोदीले दिग्गज अभिनेता नाना पाटेकरको निधनमा गहिरो शोक व्यक्त गरेका छन्।

प्रधानमन्त्री नरेन्द्र मोदीले ‘एक्स’ मा लेखेका छन्, “श्री नाना पाटेकरजीमा जस्तो तीव्रता, विशिष्टता र दमदार उपस्थिति निकै कम अभिनेतामा देख्न पाइन्छ। उहाँले हरेक भूमिकामा अद्भुत विविधता र सिर्जनशीलताको परिचय दिनुभयो र हामीलाई यस्ता पात्रहरू दिनुभयो, जसलाई पुस्तौँसम्म स्मरण गरिनेछ। उहाँ आफ्ना निर्भीक र स्पष्ट विचारका लागि पनि प्रशंसित हुनुहुन्थ्यो; आफ्ना कुरा राख्न उहाँ कहिल्यै हिचकिचाउनुहुन्नथ्यो। हिन्दी र मराठी सिनेमामा श्री नाना पाटेकरको योगदान निकै ठूलो थियो। उहाँको निधनले ठूलो कमी महसुस भएको छ। उहाँका परिवार, साथीहरू तथा असंख्य प्रशंसकहरूप्रति मेरो समवेदना। ॐ शान्ति।”

अभिनेता रितेश देशमुखले ‘एक्स’ मा लेखेका छन्, “म स्तब्ध छु। यस्तो लागिरहेको छ, मानौँ कुनै ट्रकले मलाई ठक्कर दिएको छ। नाना पाटेकरजीको निधनको खबर सुनेर गहिरो दुःख लागेको छ। उहाँ अतुलनीय र अद्वितीय अभिनेता हुनुहुन्थ्यो, जसको तुलना कसैसँग गर्न सकिँदैन।”

रितेशले नानाले आफ्नो विशेष शैली र अभिनयको विशिष्ट ढाँचाबाट मानिसहरूको मनमा विशेष स्थान बनाएको बताए। उनले भने, नानाले निभाउन नसक्ने कुनै भूमिका थिएन। उनले हरेक भूमिकामा आफूलाई प्रमाणित गरेका थिए। उनी पर्दामा मात्र नभई वास्तविक जीवनमा पनि नायक थिए। आफ्नो सामाजिक तथा परोपकारी कार्यमार्फत उनले सधैँ मानिसहरूलाई सहयोग गर्न निरन्तर काम गरे। उनले वास्तवमा यो एउटा युगको अन्त्य भएको बताए।

केन्द्रियमन्त्री नितिन गडकरीले नाना पाटेकरको निधनमा शोक व्यक्त गर्दै भने, “भारतीय फिल्म जगत्का वरिष्ठ अभिनेता नाना पाटेकरको निधनको समाचार अत्यन्तै स्तब्ध पार्ने र हृदयविदारक छ। म उहाँप्रति विनम्र श्रद्धाञ्जली अर्पण गर्दछु। नाना र मेरोबीच अत्यन्त घनिष्ठ तथा आत्मीय सम्बन्ध थियो। मराठी र हिन्दी सिनेमामार्फत उहाँले पाँच दशकभन्दा बढी समयसम्म आफ्नो दमदार अभिनयले दर्शकहरूको मनमा राज गर्नुभयो। संवाद प्रस्तुत गर्ने आफ्नो विशिष्ट शैलीमार्फत उहाँले धेरै पात्रलाई अमर बनाउनुभयो र फिल्म जगतमा आफ्नो छुट्टै पहिचान बनाउनुभयो। उहाँको निधन भारतीय फिल्म उद्योगका लागि ठूलो क्षति हो।”

उनले भने, ‘नाम फाउन्डेसन’ मार्फत महाराष्ट्रका ग्रामीण क्षेत्रमा जल संरक्षण तथा जलग्रहण विकासको क्षेत्रमा नानाले गरेको काम अत्यन्त महत्वपूर्ण र उल्लेखनीय छ। किसान आत्महत्याबाट प्रभावित परिवारहरूको सहयोगका लागि उनले बढाएको सहयोगको हात धेरै आवश्यकतामा रहेका परिवारका लागि सहारा बनेको थियो। नाना केवल उत्कृष्ट कलाकार तथा अभिनेता मात्र नभई समाजप्रति संवेदनशील व्यक्तित्व पनि थिए। ईश्वरले दिवंगत आत्मालाई शान्ति प्रदान गरून्।

महाराष्ट्र सरकारका मन्त्री आशीष शेलारले मराठी तथा हिन्दी फिल्म उद्योगमा आफ्नो अभिनयबाट अमिट छाप छोड्ने कलाकारको निधनको खबर अत्यन्त दुःखद भएको बताए। उनले नाना पाटेकरले रंगमञ्च, सिनेमा तथा सामाजिक कार्यमार्फत आफ्नो छुट्टै पहिचान बनाएको बताए। उनको निधनसँगै भारतीय फिल्म जगतले एक संवेदनशील, करारा, प्रतिभाशाली तथा असल कलाकार गुमाएको आशीष शेलारले बताए। उनले नानालाई गिरणगाउँको माटोबाट जन्मिएका सच्चा मराठी कलाकार भन्दै श्रद्धाञ्जली अर्पण गरे।

प्रशंसकहरूले उनका चलचित्रका संवाद, तस्बिर तथा भिडियोहरू सामाजिक सञ्जालमा साझा गर्दै उनलाई स्मरण गरे। धेरैले नाना पाटेकर केवल अभिनेता नभई आम मानिसका भावनालाई पर्दामा जीवन्त बनाउने आवाज भएको लेखेका छन्। उनको निर्भीक शैली, दमदार संवाद प्रस्तुति तथा सशक्त अभिनयलाई स्मरण गर्दै हजारौँ मानिसले श्रद्धाञ्जली अर्पण गरेका छन्।

उत्तर प्रदेशका मुख्यमन्त्री योगी आदित्यनाथले उनको निधनलाई कला जगत्को अपूरणीय क्षति बताएका छन्। पश्चिम बंगालका मुख्यमन्त्री शुभेन्दु अधिकारीले नाना पाटेकरको अभिनय तथा सामाजिक सरोकारलाई स्मरण गर्दै श्रद्धाञ्जली अर्पण गरेका छन्। योगी आदित्यनाथले भने, “चर्चित अभिनेता, सशक्त रंगमञ्च कलाकार तथा संवेदनशील समाजसेवी पद्मश्री नाना पाटेकरको निधन कला जगतका लागि अपूरणीय क्षति हो। आफ्नो उत्कृष्ट अभिनयबाट उहाँले भारतीय सिनेमालाई समृद्ध बनाउनुभयो र सामाजिक सरोकारमार्फत समाजप्रतिको आफ्नो प्रतिबद्धता पनि व्यक्त गर्नुभयो। भगवान् श्रीरामले दिवंगत आत्मालाई आफ्ना श्रीचरणमा स्थान दिऊन् तथा शोकाकुल परिवार र प्रशंसकहरूलाई यो दुःख सहन शक्ति प्रदान गरून्।”

शुभेन्दु अधिकारीले भने, “नाना पाटेकरको निधनको दुःखद खबर सुनेर गहिरो धक्का लागेको छ र हृदय टुटेको छ। भारतीय सिनेमाले आफ्नो सबैभन्दा दमदार, सच्चा तथा बेजोड आवाजमध्ये एक गुमाएको छ। नानाले केवल पात्रहरू निभाउनुभएन, बरु हरेक भूमिकामा निर्भीक र वास्तविक सत्यलाई जीवन्त बनाउनुभयो। ‘परिन्दा’, ‘क्रान्तिवीर’ र ‘प्रहार’को जबरदस्त ऊर्जादेखि ‘अब तक छप्पन’ को गहिरो तीव्रतासम्म, उहाँको कलाले यस्तो मापदण्ड स्थापित गरेको छ, जसको नजिक पुग्ने आशा पनि निकै कम मानिसले गर्न सक्छन्।”

अधिकारीले भने सिनेमाको संसारभन्दा बाहिर पनि उनको सरलता, गहिरो विनम्र स्वभाव तथा सामाजिक कार्य र ग्रामीण समुदायप्रतिको निःस्वार्थ समर्पणले उनको महान व्यक्तित्वलाई दर्शाउँछ। ईश्वरले नाना पाटेकरजीको आत्मालाई शान्ति प्रदान गरून्। तपाईंको आवाज, तपाईंको जोशिलो शैली तथा तपाईंको शानदार विरासत सधैँ हाम्रो हृदयमा बसिरहनेछ। उनका परिवार, साथीहरू तथा विश्वभर रहेका लाखौँ प्रशंसकहरूप्रति गहिरो समवेदना।

उत्तराखण्डका मुख्यमन्त्री पुष्कर सिंह धामीले ‘एक्स’ मा भने, “प्रसिद्ध अभिनेता नाना पाटेकरको निधनको अत्यन्त दुःखद समाचार प्राप्त भएको छ। उहाँले आफ्नो सशक्त अभिनय तथा प्रभावशाली संवादबाट भारतीय सिनेमामा विशिष्ट पहिचान बनाउनुभएको थियो। विभिन्न भूमिकामा उहाँको जीवन्त अभिनयले हिन्दी सिनेमालाई समृद्ध बनाएको थियो। उहाँको निधन चलचित्र तथा कला जगत्का लागि अपूरणीय क्षति हो। ईश्वरसँग प्रार्थना छ कि पुण्यात्मालाई श्रीचरणमा स्थान तथा शोकाकुल परिवारजन र प्रशंसकहरूलाई यो दुःख सहन शक्ति प्रदान गरून्।”

/ बिशाल