रायगञ्ज, 0९ अक्टोबर (हि.स.)। पश्चिम बङ्गालको उत्तर दिनाजपुर जिल्ला स्थित रायगञ्जमा शुक्रवार बिहान सबेरै राष्ट्रिय राजमार्ग–१२ मा भएको सड़क दुर्घटनामा पाँच जनाको मृत्यु भएको छ। मृतकहरूमध्ये पिकअप भ्यानमा सवार चार जना मजदुर र चालक रहेका छन्। सबै मृतक माल्दा जिल्लाको कालियाचक क्षेत्रका बासिन्दा थिए। पुलिसले दुर्घटनामा संलग्न दुवै सवारीसाधन जफत गरी घटनाको अनुसन्धान शुरु गरेको छ।
पुलिस अनुसार, पिकअप भ्यान बिहिवार राति कालियाचकबाट कुखुरा लिएर सिलगड़ी गएको थियो। त्यहाँ सामान झारेपछि चार जना मजदुर र चालक सहित उक्त भ्यान फर्किरहेको थियो। शुक्रवार बिहान लगभग ४ बजी बाँका मोड़ नजिकै पिकअप भ्यान र एउटा लरी आपस्तमा ठोक्किए। ठक्कर यति भीषण थियो कि भ्यानमा सवार पाँचै जनाको मृत्यु भयो।
मृतकहरूको पहिचान हसनत अली (१५), मोहम्मद रमजान मोमिन (२८), मोहम्मद मुस्तफा अन्सारी (१८), साहेल अन्सारी (१७) र पिकअप भ्यानका चालक सोहेल अख्तर (३१) का रूपमा भएको छ। दुर्घटनाको सूचना पाएपछि ट्राफिक पुलिस र दमकल विभागको टोली घटनास्थलमा पुग्यो। उद्धार अभियान सञ्चालन गरी आवश्यक कारबाही गरियो।
पुलिसले सबै शव नियन्त्रणमा लिएर पोस्टमार्टमका लागि रायगञ्ज मेडिकल कलेज अस्पताल पठाएको छ। दुर्घटनाका कारण राष्ट्रिय राजमार्गमा लगभग दुई घण्टासम्म यातायात अवरुद्ध भयो। सड़कमा सवारी आवागमन प्रभावित भएपछि पुलिसले यातायातलाई पुरानो राष्ट्रिय राजमार्गतर्फ मोड्यो।
पुलिस अधीक्षक डा. सोनावाने कुलदीप सुरेशले दुर्घटनामा पाँच जनाको मृत्यु भएको पुष्टि गरेका छन्। उनले घटनामा संलग्न दुवै सवारीसाधन जफत गरिएको जानकारी दिँदै दुर्घटनाको कारण पत्ता लगाउन अनुसन्धान भइरहेको बताए।
/ बिशाल
