ढाका, ०१ नोभेम्बर (हि.स.)। बंगलादेशको दक्षिण-पश्चिमी क्षेत्र खुलना अन्तर्गत सतखीरा जिल्लाको पाटकेलघाटामा भएको बस दुर्घटनामा एक पैदलयात्रीको मृत्यु भएको छ भने जमात-ए-इस्लामीका कम्तीमा ३० जना कार्यकर्ता घाइते भएका छन्। दुर्घटनापछि बस सडक किनारबाट तल झरेको थियो।
शनिबार राति करिब ८ः३० बजी खुलना–सातखीरा राजमार्गको चाराबोतोला क्षेत्रमा उक्त दुर्घटना भएको हो। जमातका कार्यकर्ताहरू खुलनामा आयोजित ११ दलीय गठबन्धनको सडक र्यालीमा सहभागी भएर बसमार्फत सतखीरा फर्किरहेका थिए।
दुर्घटनामा मृत्यु हुने व्यक्ति ६५ वर्षीय अब्दुल खालिक मोल्लाह रहेको पहिचान गरिएको छ। उनी पाटकेलघाटाको काशियाडांगा गाउँका बासिन्दा थिए। सडक पार गर्ने क्रममा बसले उनलाई ठक्कर दिँदा घटनास्थलमै मृत्यु भएको बताइएको छ। त्यसपछि बस अनियन्त्रित भएर सडक किनार खसेको थियो।
सतखीरा जमातका महासचिव अजिजुर रहमानका अनुसार, वृद्ध व्यक्तिलाई जोगाउने प्रयास गर्दा बस सडकबाट तल खस्यो, जसका कारण कम्तीमा ३० जना कार्यकर्ता घाइते भएका हुन्।
पाटकेलघाटा पुलिस चौकीका प्रभारी तफजल हुसेनले दुर्घटनाको पुष्टि गर्दै बस चालकको अवस्था गम्भीर रहेको र अन्य घाइतेहरूलाई सामान्य चोट लागेको जानकारी दिएका छन्।
हिन्दुस्थान समाचार / बिशाल
