काठमाडौँ, 0१ नोभेम्बर (हि.स.)। नेपालको डोल्पा जिल्लामा भारी हिमपातका कारण शे-फोक्सुण्डो तालतर्फ गइरहेका छ जना भारतीय पर्यटक बेपत्ता भएका छन्। बेपत्ता हुनेमा दुई महिला र चार पुरुष रहेका छन्। नुम्ला र बगला भञ्ज्याङ क्षेत्रमा उनीहरूसँगको सम्पर्क टुटेको हो।
प्रमुख जिल्ला अधिकारी जुनु हमालका अनुसार, पर्यटकहरू धो क्षेत्रबाट फोक्सुण्डो तालतर्फ फर्किने क्रममा हिमपातमा फसेका हुन्। स्थानीय बासिन्दाले पहाडी भञ्ज्याङ पार गर्न कठिनाइ हुने भन्दै सावधानी अपनाउन आग्रह गरे पनि उनीहरू अगाडि बढेका थिए। त्यसपछि उनीहरूसँग सम्पर्क हुन सकेको छैन।
शे-फोक्सुण्डो गाउँपालिकाका अध्यक्ष धावा साम्दुक गुरुङका अनुसार, वार्ड नम्बर ४ र ८ बीच पर्ने उक्त भञ्ज्याङ क्षेत्रमा मोबाइल सञ्जाल उपलब्ध छैन। सञ्चार सुविधाको अभावमा बेपत्ता पर्यटकहरूको अवस्थाबारे जानकारी सङ्कलन गर्न कठिनाइ भइरहेको छ।
डोल्पाका पुलिस नायब उपाधीक्षक अनिलराज गिरीले पर्यटकहरूको अवस्था अझै अज्ञात रहेको बताएका छन्। खोजी तथा उद्धार कार्यका लागि सम्बन्धित निकायसँग हेलिकोप्टरको व्यवस्था गर्न अनुरोध गरिएको छ।
प्रमुख जिल्ला अधिकारी हमालका अनुसार, बेपत्ता पर्यटकहरूको खोजी तथा सुरक्षित उद्धारका लागि नेपाली सेनाको टोलीसमेत परिचालन गरिएको छ।
हिन्दुस्थान समाचार / बिशाल
