केदारनाथ धाम (उत्तराखण्ड), ११ नोभेम्बर (हि.स.)। हिमालयको काखमा अवस्थित बाबा केदारनाथको पवित्र धामको कपाट शीतकालका लागि बुधबार बिहान ८ः३० बजी परम्परागत धार्मिक अनुष्ठान तथा वैदिक मन्त्रोच्चारणका बीच बन्द गरिएको छ। अब बाबा केदारको चल विग्रह उत्सव डोली उखीमठस्थित ओंकारेश्वर मन्दिर लगिनेछ। जाडो महिनामा यही मन्दिर भगवानको शीतकालीन निवासस्थल रहनेछ।

भाइटीकाको दिन परेको मन्दिर बन्द गर्ने अवसरमा देश तथा विदेशबाट आएका श्रद्धालुहरू भगवान् शिवको दर्शन र आशीर्वाद लिन केदारनाथ धाममा भेला भएका थिए। मन्दिर करिब छ महिनासम्म बन्द रहनेछ।

केदारनाथ धामका मुख्य पुजारी गंगाधर लिङ्ग महाराजले निर्धारित धार्मिक विधिअनुसार मन्दिर बन्द गर्ने प्रक्रिया सम्पन्न गरिएको जानकारी दिए। उनले भने, “आज भाइटीका हो। बिहान भगवानको महाभिषेक तथा विशेष पूजा-अर्चना गरियो र बिहान ८ः३० बजी मन्दिरको मुख्य कपाट बन्द गरियो।”

अब बाबा केदारको उत्सव डोली उखीमठस्थित ओंकारेश्वर मन्दिर पुर्‍याइनेछ, जहाँ शीतकालीन महिनाहरूमा भगवानको नियमित पूजा-अर्चना गरिनेछ।

रुद्रप्रयागकी पुलिस अधीक्षक निहारिका तोमरले मन्दिर बन्द गर्ने समारोह तथा त्यसपछि हुने उत्सव डोलीको यात्राका लागि व्यापक सुरक्षा व्यवस्था मिलाइएको जानकारी दिइन्। देवताको आसन (गद्दी) लाई केदारनाथबाट उखीमठस्थित शीतकालीन आसनसम्म लगिने उनले बताइन्।

उनका अनुसार, डोली यात्राका लागि ‘गार्ड अफ अनर’ तथा मोबाइल सुरक्षा टोली परिचालन गरिएको छ। डोली यात्राका क्रममा पर्ने प्रमुख विश्रामस्थलहरूमा पनि सुरक्षाकर्मी तैनाथ गरिएको छ।

आगामी वर्ष मन्दिर पुनः खुल्ला नभएसम्म केदारनाथमा जिल्ला पुलिस बल तैनाथ रहनेछ। यसका साथै भारत-तिब्बत सीमा पुलिसको एक टोली पनि त्यहाँ परिचालन गरिनेछ।

तोमरले उखीमठमा शीतकालीन तीर्थयात्राका क्रममा सुरक्षा, यातायात तथा मार्ग व्यवस्थापनका लागि आवश्यक तयारी भइरहेको बताउँदै श्रद्धालुहरूलाई दर्शनका लागि ओंकारेश्वर मन्दिर पुग्न आग्रह गरे।

हिन्दुस्थान समाचार / बिशाल