गुमला, ११ नोभेम्बर (हि.स.)। राष्ट्रिय महिला आयोगकी अध्यक्ष विजया राहटकर बुधवार झारखण्डको गुमला पुगिन्। त्यहाँ उनले दिवङ्गत सामाजिक कार्यकर्ता निशा भगतका परिवारका सदस्यहरूसँग भेट गरी घटनाबारे जानकारी लिइन्। साथै, परिवारलाई न्याय दिलाउने आश्वासन दिइन्। उनले महिलामाथि हुने हिंसा तथा उत्पीड़नका घटनाहरू गम्भीर चिन्ताको विषय रहेको बताउँदै यस्ता घटनामा दोषीहरू विरुद्ध कड़ा कारबाही सुनिश्चित गर्नुपर्नेमा जोड दिइन्।

भेटका क्रममा विजया राहटकरले झारखण्डमा महिलामाथि उत्पीड़नका घटनाहरू बढ्दै गएकोप्रति चिन्ता व्यक्त गरिन्। उनले निशा भगत प्रकरणमा राज्य सरकारले केन्द्रिय अनुसन्धान ब्युरो (सीबीआई) बाट जाँच गराउने गरेको सिफारिसको स्वागत गरिन्। तर, जाँचको सिफारिस गर्दैमा सरकारको जिम्मेवारी पूरा नहुने स्पष्ट पारिन्। महिलाको सुरक्षा सुनिश्चित गर्न तथा यस्ता घटनाको पुनरावृत्ति रोक्न पुलिस र प्रशासनले प्रभावकारी एवं कड़ा कदम चाल्नुपर्ने उनको भनाइ थियो।

आयोगकी अध्यक्षले यसअघि नै राज्यका पुलिस महानिदेशक (डीजीपी) तदाशा मिश्रासँग यस घटनाबारे जानकारी लिएको र गम्भीरतापूर्वक कारबाही गर्न निर्देश दिएको बताइन्। उनले राँची पुगेपछि पुलिस तथा जिल्ला प्रशासनका वरिष्ठ अधिकारीहरूसँग बैठक गर्ने जानकारी दिइन्। बैठकमा महिलासँग सम्बन्धित घटनाहरूमा हालसम्म भएका कारबाही, अनुसन्धानको अवस्था तथा प्रशासनिक व्यवस्थाको समीक्षा गरिनेछ।

विजया राहटकरले महिला सुरक्षासँग सम्बन्धित घटनामा कुनै पनि प्रकारको लापरबाही सह्य नहुने सङ्केत गर्दै पीड़ित परिवारलाई समयमै न्याय दिलाउनु प्रशासनको प्राथमिकता हुनुपर्ने बताइन्।

हिन्दुस्थान समाचार / भवानी थामी