तिरुप्पुर, ११ नोभेम्बर (हि.स.)। तमिलनाडुको तिरुप्पुर जिल्लामा लागुऔषधको बिक्री तथा सेवनमा नियन्त्रण गर्न पुलिसले विशेष अभियान सञ्चालन गरी १३ जनालाई पक्राउ गरेको छ। यस क्रममा आरोपीहरूको साथबाट गाँजा, गाँजाको चकलेट र गुट्खाजन्य उत्पादन बरामद गरिएको छ। अभियानअन्तर्गत प्रहरीका ४६ टोलीले व्यावसायिक प्रतिष्ठान तथा लजसहित करिब ९२ स्थानमा सघन जाँच गरेका थिए।

तिरुप्पुरकी पुलिस अधीक्षक सृष्टि सिंहले बुधबार जिल्ला पुलिस कार्यालयमा पत्रकारहरूलाई जानकारी दिँदै आम नागरिकको सुरक्षा सुनिश्चित गर्न, लागुऔषधको तस्करी तथा बिक्री रोक्न र आपराधिक पृष्ठभूमि भएका व्यक्तिहरूको गतिविधिमाथि निगरानी राख्न यो विशेष अभियान सञ्चालन गरिएको बताइन्। उनले जिल्लामा लागुऔषधसँग सम्बन्धित अपराधीहरूविरुद्ध निरन्तर कारबाही भइरहेको बताइन्। अहिलेसम्म यस्ता करिब १४३ अपराधीविरुद्ध कारबाही गरिएको छ। यसका अतिरिक्त भारतीय नागरिक सुरक्षा संहिता (बीएनएसएस) को धारा १२९ अन्तर्गत निवारक बन्ड आदेश पनि प्राप्त गरिएको छ।

पुलिस अधीक्षकले जिल्लामा नोभेम्बर ९ देखि ड्रोनमार्फत निगरानी अभियान पनि शुरु गरिएको बताइन्। सुनसान तथा अँध्यारा स्थानहरूमा जुवा खेल्ने र सार्वजनिक स्थानमा मदिरा सेवन गर्ने घटनामा १३४ वटा मुद्दा दर्ता गरिएको छ।

उनले गम्भीर अपराध तथा हिंसात्मक घटनामा संलग्न ७१ जना हिस्ट्रीसिटरहरूको गतिविधिको पनि जाँच गरिएको बताइन्। उनीहरूमध्ये १७ जनालाई पक्राउ गरी कारबाही गरिएको छ।

सृष्टि सिंहले आम नागरिकलाई लागुऔषधको बिक्री तथा सेवनबाट टाढा रहन अपील गरिन्। उनले यस्ता गतिविधिबारे जानकारी प्राप्त भएमा मानिसहरूले ‘ड्रग फ्री तमिलनाडु’ एप वा पुलिस आपत्कालीन हेल्पलाइन नम्बर १०० मा सूचना दिन सक्ने बताइन्।

पुलिसकर्मीहरूलाई थप सुरक्षा तथा हतियार उपलब्ध गराउने विषयमा सोधिएको प्रश्नको जवाफ दिँदै उनले सम्बन्धित क्षेत्रको परिस्थितिका आधारमा यसको आवश्यकता निर्धारण गरिने बताइन्। आवश्यकताअनुसार थप सुरक्षा व्यवस्था तथा हतियार उपलब्ध गराइनेछ। उनले तिरुप्पुर जिल्लामा अहिलेसम्म यस प्रकारको कुनै अप्रिय घटना सामने नआएको स्पष्ट पारिन्। सप्ताहान्तमा सशस्त्र प्रहरी बल तथा विशेष पुलिस टोलीहरूद्वारा लागुऔषधविरुद्ध नियमित जाँच अभियान जारी रहनेछ।

हिन्दुस्थान समाचार / भवानी थामी