काठमाडौँ, ०४ नोभेम्बर (हि.स.)। नेपाल भ्रमणमा रहेका भारतका विदेश सचिव विक्रम मिस्रीले आफ्ना नेपाली समकक्षी अमृत राईसँग द्विपक्षीय वार्ता गरेका छन्। बुधबार भएको उक्त वार्तामा नेपालका प्रधानमन्त्री बालेन्द्र शाहको भारत भ्रमणका क्रममा उठाइने विषय तथा कार्यसूचीबारे छलफल भएको छ।

भारतीय विदेश सचिव मिस्रीले प्रधानमन्त्रीको भारत भ्रमणका सन्दर्भमा अघि बढाइने विभिन्न महत्त्वपूर्ण पहलहरू वार्ताको मुख्य विषय रहेको बताए। यसका लागि विस्तृत कार्यसूची तयार पारिएको र नेपाली विदेश सचिवसँग त्यसबारे छलफल गर्न आफू उत्सुक रहेको उनले उल्लेख गरे।

यसैगरी, भोटेकोशी बाढीबाट क्षति पुगेका नेपालको पूर्वाधार संरचनाको पुनर्निर्माण तथा पुनर्स्थापनाका लागि भारत सहयोग गर्न तयार रहेको मिस्रीले बताएका छन्।

बुधबार नेपाली विदेश सचिव अमृतबहादुर राईसहितको प्रतिनिधिमण्डलसँग भएको वार्तामा मिस्रीले बाढीका कारण नेपालको पूर्वाधार क्षेत्रमा ठूलो क्षति पुगेको र त्यसको पुनर्निर्माणमा भारत सहयोग गर्न इच्छुक रहेको बताए।

उनले लामो समयदेखि समाधान हुन बाँकी रहेका विषयहरू टुङ्ग्याउन तथा दुवै पक्षबाट शुरू गरिएका महत्त्वपूर्ण पहलहरूको कार्यान्वयनमा पनि प्रगति भइरहेको उल्लेख गरे। यसका लागि दुवै देशका अधिकारीहरू प्रशंसा र बधाईका पात्र रहेको उनको भनाइ थियो।

भारत र नेपालबीच विशिष्ट सम्बन्ध रहेको उल्लेख गर्दै उनले दुवै देश सुख-दुःख तथा हरेक परिस्थितिमा एकअर्काका साझेदार रहँदै आएको बताए। भोटेकोशी बाढीपछि उत्पन्न कठिन परिस्थितिमा दुई देशबीचको सम्बन्धलाई व्यवहारमा प्रस्तुत गर्ने अवसर प्राप्त भएको पनि उनले उल्लेख गरे।

भारतले नेपाललाई सहयोग उपलब्ध गराएको बताउँदै मिस्रीले प्राकृतिक विपत्तिका कारण नेपालको पूर्वाधार क्षेत्रमा भएको ठूलो क्षति र विनाशप्रति भारत जानकार रहेको बताए।

नेपालमा पुनर्निर्माण तथा पुनर्स्थापनाको प्रक्रिया अघि बढ्दै जाँदा आवश्यक सहयोग र परियोजनासम्बन्धी प्रस्तावहरूमाथि विचार गर्न भारत तयार रहेको उनले स्पष्ट पारे। यस विषयमा प्रारम्भिक छलफल भइसकेको र नेपाली नेतृत्वसँग थप विस्तृत जानकारीसहित आगामी दिनमा छलफल गर्न भारत इच्छुक रहेको उनको भनाइ थियो।

उनले दुई देशबीचका विभिन्न महत्त्वपूर्ण पहल तथा सहकार्यलाई अघि बढाउन दुवै पक्षका अधिकारीहरूले गरेको प्रयासको प्रशंसा गर्दै भविष्यमा पनि सहयोग निरन्तर रहने विश्वास व्यक्त गरे।

हिन्दुस्थान समाचार / बिशाल