कोलकाता, 24 फरवरी (हि.स.)। भारतीय जनता पार्टी (भाजपा) यस वर्ष हुने विधानसभा चुनाउ अघि पश्चिम बंगालमा आफ्नो बहुप्रतीक्षित परिवर्तन यात्राको शूरुवात १ मार्चदेखि गर्न गइरहेको छ। पार्टीले यस पटक ठूलो स्तरमा केन्द्रिय नेतृत्वलाई मैदानमा उतारेर शक्ति प्रदर्शनको रणनीति अपनाइरहेको छ। ४८ घण्टाभित्र कम्तिमा आठ केन्द्रिय मन्त्री र राष्ट्रिय स्तरका नेताहरू राज्यमा आइपुग्नेछन्।
यो यात्रा राज्यका दशमध्ये नौ संगठनात्मक प्रभागहरूमा निकालिनेछ। केवल कोलकाता महानगर प्रभागलाई यसबाट अलग राखिएको छ, जहाँ समापनमा ब्रिगेड मैदानमा विशाल जनसभा आयोजना गरिनेछ। १ मार्चमा यात्राको शुरुवात ,कूचबिहार, कृष्णानगर, कुल्टी, गढबेता र रायदीघीबाट हुनेछ। २ मार्चमा इस्लामपुर, हसन, सन्देशखाली र आमताबाट यात्राको शुभारम्भ गरिनेछ। केन्द्रिय गृहमन्त्री अमित शाहले १ मार्चमा रायदीघीबाट परिवर्तन यात्रालाई हरियो झण्डा देखाउने छन्। केन्द्रिय स्वास्थ्य मन्त्री जगत प्रकाश नड्डाले सोही दिन कृष्णानगरबाट यात्राको उद्घाटन गर्ने छन्। रक्षामन्त्री राजनाथ सिंहले २ मार्चमा आमताबाट यात्राको शुरुवात गर्नेछन्।
राष्ट्रिय अध्यक्ष नितिन नवीन दुवै दिन उत्तर बंगालमा रहनेछन् र १ मार्चमा कूचबिहार तथा २ मार्चमा इस्लामपुरबाट यात्राको उद्घाटन गर्ने छन्। केन्द्रिय शिक्षा मन्त्री धर्मेन्द्र प्रधानले गढबेताबाट, जबकि महिला तथा बाल विकास मन्त्री अन्नपूर्णा देवीले कुल्टीबाट यात्राको शुभारम्भ गर्नेछन्। २ मार्चमा महाराष्ट्रका मुख्यमन्त्री देवेन्द्र फडणवीसले हासनबाट र केन्द्रिय कृषि मन्त्री शिवराज सिंह चौहानले सन्देशखालीबाट यात्रालाई प्रस्थान गर्ने छन्।
यसअघि प्रतिपक्षी दलका नेता शुभेन्दु अधिकारीले रायदीघीमा आरोपपत्र प्रस्तुति कार्यक्रमको नेतृत्व गर्दै मथुरापुर, जयनगर र डायमण्ड हार्बर संगठनात्मक जिल्लाहरूसँग सम्बन्धित माग र गुनासाहरूको दस्तावेज जारी गरे। राज्यभर यस्तै कार्यक्रमहरू आयोजना गरिए, जसमा मिथुन चक्रवर्ती, अग्निमित्रा पाल, अभिजीत गंगोपाध्याय, सौमेन्दु अधिकारी, दिलीप घोष र रुद्रनील घोषसहित धेरै नेताहरू सहभागी भए।
भाजपा राज्य समितिका एक वरिष्ठ नेताले मंगलबार जानकारी दिए, २०२१ को विधानसभा चुनाउको विपरीत, जब पार्टीले ठूलो स्तरमा दल-बदल कार्यक्रमहरूमा जोड दिएको थियो, यस पटक त्यस्ता आयोजनहरूबाट दूरी बनाइएको छ। परिवर्तन यात्रालाई शीर्ष नेतृत्वको शक्तिको प्रदर्शन र २०२६ को चुनावी अभियानको औपचारिक शुरुवातको रूपमा प्रस्तुत गरिँदैछ।
---------------
हिन्दुस्थान समाचार / भवानी थामी
