नयाँ दिल्ली, 24 मार्च (हि.स.)। असम राइफल्सको स्थापना दिवसमा केन्द्रिय गृह तथा सहकारी मन्त्री अमित शाह, सामाजिक न्याय एवं सशक्तिकरण मन्त्री डा. वीरेन्द्र कुमार र हरियाणाका मुख्यमन्त्री नायब सैनीले बहादुर सैनिकहरू र उनीहरूका परिवारहरूलाई शुभकामना व्यक्त गरे। नेताहरूले पूर्वोत्तरको सिमानाको रक्षा गर्ने असम राइफल्सको साहस, अनुशासन र समर्पणलाई राष्ट्रको एकता र सुरक्षाको लागि प्रेरणाश्रोत बताए।

अमित शाहले एक्समा लेखेका छन्, असम राइफल्सका जवानहरूले पूर्वोत्तरको कठिन भूभागमा सीमाहरूको रक्षा गर्छन् र मानवीय सहयोग मार्फत समुदायहरू बीच विश्वास निर्माण गर्छन्। उनले राष्ट्रको सेवामा आफ्नो जीवन बलिदान दिने शहीद सैनिकहरूलाई पनि सम्झे।

डा. वीरेन्द्र कुमारले असम राइफल्सको 191औं स्थापना दिवसमा सैन्य कर्मीहरू, भेटेरनहरू र उनीहरूका परिवारहरूलाई शुभकामना दिए। उनले सीमाहरूको रक्षा गर्न र राष्ट्रलाई सुरक्षित गर्न वीरता, अनुशासन र समर्पणको प्रतीक असम राइफल्सले गरेको प्रयास प्रशंसनीय रहेको बताए।

मुख्यमन्त्री सैनीले असम राइफल्सलाई उत्तरपूर्वको प्रहरी बताउँदै भने, राष्ट्रको एकता, अखण्डता र सुरक्षाप्रति उनीहरूको अदम्य साहस र समर्पण प्रेरणादायी छ।

1835 मा स्थापित असम राइफल्स देशको सबैभन्दा पुरानो अर्धसैनिक बल हो। असम राइफल्स सीमा सुरक्षा, आपदा प्रबन्धन, मानवीय सहयोग र स्थानीय समुदायहरूसँग विश्वास निर्माणमा सक्रिय छ। हाल यो बल गृह मन्त्रालयको प्रशासनिक नियन्त्रण र रक्षा मन्त्रालयको सञ्चालन नियन्त्रण अन्तर्गत सञ्चालन हुन्छ।

हिन्दुस्थान समाचार / भवानी थामी