इम्फाल, २८ मार्च (हि.स.)। मणिपुरमा प्रतिबन्धित संगठनहरूविरुद्ध चलिरहेका अभियानहरूमा सुरक्षा बलहरूलाई निरन्तर सफलता मिलिरहेको छ। मणिपुर पुलिस मुख्यालयले आज दिएको आधिकारिक जानकारी अनुसार, राज्यका विभिन्न भागहरूमा विगत २४ घण्टामा विभिन्न प्रतिबन्धित संगठनहरूका कुल आठ क्याडरहरूलाई पक्राउ गरिएको छ।

पहिलो अभियानमा सुरक्षा बलहरूले शुक्रबार प्रतिबन्धित संगठन यूएनएलएफ (पी) का एक सक्रिय क्याडर थोङबम प्रेमजीत सिंह (४९) लाई गिरफ्तार गरेका छन्। उनी पश्चिम इम्फाल जिल्लाको थाङ्गमेइबन्द काबराबम लेइकाईका बासिन्दा हुन्। उनलाई उनकै घरबाट पक्राउ गरियो। उनी २०२२ को शुरुवातमा सगोलबन्द ताखेलम्बम लेइकाईमा भएको एक बम विस्फोटसँग सम्बन्धित इम्फाल थानामा दर्ता भएको एक प्राथमिकीको मामिलामा अभियुक्त छन्।

दोस्रो अभियानमा यिनै सुरक्षा बलहरूले प्रतिबन्धित संगठन आरपीएफ/पीएलए का एक सक्रिय क्याडर चिङ्गाखाम नोङपोकंगनबा मैतेई (२१) लाई पक्राउ गरे, जो इम्फाल पूर्व जिल्लाको लामलाई थानाअन्तर्गत ताखेल अवाङ लेइकाईका बासिन्दा हुन्। उनलाई उनकै क्षेत्रबाट पक्राउ गरियो।

तेस्रो अभियानमा सुरक्षा बलहरूले तेङनौपाल जिल्लाको मोरेह थानाअन्तर्गत अन्तरराष्ट्रिय सीमा पोस्ट ७३ र ७४ बीचबाट प्रतिबन्धित संगठन केसीपी र केवाईकेएलका एक-एक क्याडरहरूलाई पक्राउ गरेको छ । क्याडरहरूको पहिचान केसीपी क्याडर अंगोम लेम्बा मैतेइ उर्फ लिकलाईगम्बा (२६) को रूपमा भएको छ। उनी इम्फाल पूर्व जिल्लाको टप मोइराङ काम्पूका बासिन्दा छन्। केवाईकेएल क्याडर युमनाम बोनी मैतेइ उर्फ यैताम्बा (४२) को रूपमा उनको पहिचान भएको छ। उनी इम्फाल पश्चिम जिल्लाको काचिखुनका बासिन्दा हुन्।

यसै श्रृङ्खलामा गत बिहिबार सुरक्षा बलहरूले तेङनौपाल जिल्लाको मोरेह थानाअन्तर्गत अन्तरराष्ट्रिय सीमा पोष्ट ७८ र ७९ बीचबाट प्रतिबन्धित संगठन पीएलए का एक सक्रिय सदस्यलाई पक्राउ गरे। क्याडरको पहिचान काकचिङ जिल्लाको काकचिङ खुनौ निवासी चोङथम नानाव सिंह उर्फ खुनौ (२९) को रूपमा भएको छ।

सोही बिहिबार नै सुरक्षा बलहरूले इम्फाल पूर्व जिल्लाका विभिन्न क्षेत्रहरूबाट प्रतिबन्धित संगठन पीएलए/आरपीएफ का तीन क्याडरहरूलाई पक्राउ गरे। यिनीहरूमाथि इम्फाल क्षेत्रमा व्यापारीहरूलाई निशाना बनाएर आईईडी विस्फोटको योजना बनाएको आरोप छ। क्याडरहरूको पहिचान फंजौबम रबी मैतेइ उर्फ लुवांगम्बा (२८), मो. रुवाज आरिफ उर्फ बाबूल (२३), मो. अब्दुल हकीम उर्फ इनाओचा (३५) को रूपमा भएको छ। यिनीहरूबाट तीन आईईडी, लगभग २.४७ केजी टीएनटी, दुई डेटोनेटर, दुई टाइमर, तीन मोबाइल फोन आदि बरामद गरिएको छ।

---------------

हिन्दुस्थान समाचार / भवानी थामी