जयपुर, 06 मार्च (हि.स.)। शहरको हाथोज क्षेत्रस्थित नारायण सिटीमा गए बिहिवार राति एक फर्निचर गोदाममा भीषण आगो लाग्यो। आगो राधा रानी वाटर पार्क नजिकै अवस्थित एक फर्निचर फ्याक्ट्रीमा लागेको थियो जसबाट गोदाममा ठूलो संख्यामा रखिएको फर्निचरहरू जलेर खरानी भयो।

जानकारी अनुसार आगलागी हुँदा गोदाममा लगभग आधा दर्जन श्रमिकहरूले काम गरिरहेका थिए। आगो बलेको देख्नसाथ श्रमिकहरूले त्यहाँबाट बाहिर निक्लेर आफ्नो ज्यान बचाए। फ्याक्ट्री परिसरमा रहेका 13 जनाभन्दा अधिक बाल-बालिका, महिला तथा अन्य मानिसहरू पनि सुरक्षित बाहिर निक्लिए जसले गर्दा ठूलो दुर्घटना हुनदेखि बच्यो।

स्थानीय मानिसहरूले गोदाममा आगो बलिरहेको देखेर तुरून्तै फायर ब्रिगेडलाई सूचना दिए। दमकल पुग्न अगावै ग्रामीणहरूले ट्याङ्करबाट पानी हालेर आगोलाई निभाउने प्रयास गरिरहेका थिए। त्यसपछि जयपुरदेखि दमकलका 20 वटा वाहनहरूले घटनास्थलमा पुगेर आगोलाई नियन्त्रण गरे। भनिन्छ, गोदाममा फर्निचरसितै ज्वलनशील पदार्थ तथा केमिकल पनि राखिएको थियो जसले गर्दा आगो झन् द्रूत गतिमा फैलियो।

सूचना पाएर खोरा बिसल थाना पुलिससितै कालवाड़ र करधनी थाना पुलिस पनि घटनास्थलमा पुग्यो। थानाधिकारी सुरेन्द्र सिंहले घटनास्थलमा पुगेर स्थितिलाई सम्हाले। पुलिस टीमले स्थानीय मानिसहरूको सहयोगमा भित्र फसेका मानिसहरूलाई बाहिर निकाल्यो।

हिन्दुस्थान समाचार / उष्णता छेत्री शर्मा