गेजिङ, 06 मार्च (हि.स.)। योक्सम-टाशीडिङ निर्वाचन क्षेत्र अन्तर्गत दुर्गम लोवर कर्जी मार्ताम गाउँ अब सडक मार्गले जोडिएको छ, जसले गाउँलेहरूलाई ठूलो राहत दिएको छ। पहिले दुर्गम बस्ती मानिने यो गाउँमा अहिले आधारभूत सुविधाहरूको पहुँचसँगै सम्पर्क सञ्जालमा सुधार आएको छ।
क्षेत्र विधायक तथा पर्यटन एवं नागरिक उड्डयन विभाग मन्त्री छिरिङ टी भोटियाले बिहिवार स्थलको भ्रमण गरे र नवनिर्मित सडकका साथै क्षेत्रका अन्य विकास कार्यहरूको निरीक्षण गरे। यस क्रममा उनले सडकमा अलकत्र लगाउने काम पनि चाँडै शुरु हुने जानकारी दिए।
कर्जी सरकारी माध्यमिक विद्यालयबाट नवनिर्मित उक्त २.८ किलोमिटर सडक अब लोवर कर्जी मार्ताम गाउँसँग सिधै जोडिएको छ। यो सडक गाउँले यातायातमा सुधार ल्याउनुका साथै गाउँलेहरूलाई आवश्यक सेवाहरू र अन्य आधारभूत सुविधाहरूमा सजिलो पहुँच प्रदान गर्नेछ।
गाउँलेहरूले खुशी व्यक्त गर्दै आफ्नो दुर्गम गाउँमा विकास सहयोग पुर्याएकोमा मुख्यमन्त्री प्रेमसिंह तामाङ र राज्य सरकारलाई धन्यवाद दिएका छन्। यसैगरी, गाउँलेहरूले आफ्नो दुर्गम गाउँको विकासलाई प्राथमिकता दिएकोमा तथा क्षेत्रमा पूर्वाधार र सार्वजनिक सुविधाहरू सुधार गर्न निरन्तर सहयोग गरेकोमा क्षेत्र विधायक भोटियाको प्रयासको पनि सराहना गरेका छन्।
हिन्दुस्थान समाचार / बिशाल
