नयाँ दिल्ली, १ अप्रेल (हि.स.)। सरकारी तेल विपणन कम्पनीहरू (ओएमसी) ले नयाँ आर्थिक वर्ष २०२६-२७ को पहिलो दिन नै एटीएफ अर्थात् एविएसन टर्बाइन इन्धन वा जेट इन्धनको मूल्यमा जबरदस्त वृद्धि गरेका छन्। यो वृद्धिपछि पहिलो पटक जेट इन्धनको मूल्य दुई लाख रुपियाँ प्रति किलो लिटरको स्तर पार गरेको छ। पश्चिम एसियामा जारी संकटका कारण देशमा पहिलो पटक जेट इन्धनको मूल्यमा दोब्बरभन्दा बढी वृद्धि गरिएको छ।

उल्लेखनीय छ, यो लगातार दोस्रो महिना हो, जब सरकारी तेल विपणन कम्पनीहरूले जेट इन्धनको मूल्यमा वृद्धि गरेका छन्। आज यसको मूल्यमा दोब्बरभन्दा बढी वृद्धि भएपछि सम्पूर्ण एयरलाइन्ससहित सिभिल एविएसन क्षेत्रमा काम गर्ने सबै कम्पनीहरूको सञ्चालन खर्चमा जबरदस्त वृद्धि निश्चित भएको छ। यस्तो अवस्थामा अब हवाई यात्रा अझ महँगो हुने आशंका पनि बनेको छ।

यो सम्बन्धमा उपलब्ध गराइएको जानकारी अनुसार दिल्लीमा जेट इन्धनको मूल्य १,१०,७०३.०८ रुपियाँ प्रति किलो लिटर अर्थात् ११४.५ प्रतिशत बढाइएको छ। यो वृद्धिपछि यसको मूल्य २,०7,३४१.२२ रुपियाँ प्रति किलो लिटर पुगेको छ। आज भन्दा अघि गत महिना १ मार्चमा एटीएफको मूल्यमा ५,२४४.७५ रुपियाँ प्रति किलो लिटर अर्थात् ५.७० प्रतिशत वृद्धि गरिएको थियो।

तेल विपणन कम्पनीहरूले आज गरेको वृद्धिपछि पहिलो पटक जेटफ्यूल (एटीएफ) को मूल्य दुई लाख रुपियाँ प्रति किलो लिटरको आंकडा पार गरेको छ। यसअघि २०२२ मा एटीएफको मूल्य आफ्नो सर्वकालिक उच्च बिन्दुमा पुगेको थियो। त्यतिबेला रुसले युक्रेनमा आक्रमण गरेपछि तेलको मूल्यमा भारी उछाल आएको थियो, जसका कारण जेट इन्धनको मूल्य १.१० लाख रुपियाँ प्रति किलो लिटर पुगेको थियो। यद्यपि पछि यसको मूल्यमा गिरावट आएको थियो, जसले जेट इन्धन एक लाख रुपियाँको स्तरभन्दा तल झरेको थियो।

हालको समयमा अमेरिका र इजरायल तथा ईरानबीच जारी युद्धका कारण विश्वभर ऊर्जा संकटको अवस्था बनेको छ। युद्धका कारण काँचो तेलको ओसार-पसारमा प्रयोग हुने महत्वपूर्ण समुद्री मार्ग होर्मुज स्ट्रेट लगभग बन्दजस्तो अवस्थामा पुगेको छ। यसका कारण विश्वका धेरै देशहरूलाई यो बाटोबाट हुने ग्यास र काँचो तेल लगभग रोकिएको छ। यसैगरी यो युद्ध र होर्मुज स्ट्रेटको रोकावटका कारण कच्चा तेलको मूल्य पनि आकाश छुन पुगेको छ।

---------------

हिन्दुस्थान समाचार / भवानी थामी