कोलकाता, 17 अप्रेल (हि.स.)। पश्चिम बंगाल विधानसभा चुनाउबीच केन्द्रिय एजेन्सीहरूले राज्यमा आफ्नो कारबाही जारी राखेका छन्। प्रवर्तन निर्देशनालय (ईडी) ले एक रियल एस्टेट कम्पनी र एक निर्माण फर्मको परिसरमा छापा मारेको छ भने आयकर विभागले तृणमूल कांग्रेसका उम्मेदवार देबाशिष कुमारको निवास सहित धेरै स्थानमा छापा मारेको छ। केन्द्रिय बलहरूसँगै शुक्रवार बिहान धेरै ईडी टोलीहरू सीजीओ कम्प्लेक्समा आइपुगे।
शुक्रवार बिहानदेखि नै ईडीका छुट्टाछुट्टै टोलीहरूले एक रियल एस्टेट कम्पनीसँग सम्बन्धित धेरै स्थानमा खोजी गर्न थालेका छन्। ईडीका अधिकारीहरू सल्ट लेक र कोलकाताका चार स्थानमा पुगेका छन्। उनीहरूले रियल एस्टेट कम्पनी मात्र नभई अर्को निर्माण कम्पनीको कार्यालयमा पनि छापा मारेका छन्।
सूत्रहरू अनुसार, यो खोजी अभियान वित्तीय ठगी मुद्दासँग सम्बन्धित छ। ज्ञात होस्, केही दिनअघि यस निर्माण कम्पनीसँग सम्बन्धित घर, फ्ल्याट र कार्यालयहरूमा खोजी गरिएको थियो। ईडीले यो अभियान चुनाउअघि अवैध वित्तीय लेनदेन रोक्न र केही भूमि सम्बन्धी मामिलाहरूमा लेनदेनको बारेमा जानकारी पत्ता लगाउनको लागि गरिएको दाबी गरेको छ।
यसैबीच ईडी बाहेक अर्को केन्द्रिय एजेन्सी, आयकर विभागले पनि कोलकातामा खोजी गरिरहेको छ। उनीहरूले शुक्रवार बिहान धेरै स्थानमा छापा मारे, जसमा रासबिहारी निर्वाचन क्षेत्रका लागि तृणमूल उम्मेदवार देबाशीष कुमारको घर पनि समावेश छ।
आयकर विभागको एक टोली शुक्रवार बिहान रासबिहारीका निवर्तमान विधायक देबाशीष कुमारको मनोहरपुकुर रोड स्थित घरमा पुग्यो। आयकर विभागका अधिकारीहरूले उनको घरमा मात्र होइन, मनोहरपुकुर रोड स्थित उनको चुनाउ कार्यालयमा पनि छापा मारेका थिए। यसका साथै मोतीलाल नेहरू रोड स्थित देबाशीषको कार्यालयमा पनि खोजी गरियो।
यसैबीच राज्यको सत्तारुढ़ दल, तृणमूल कांग्रेसले चुनाउअघि दुई केन्द्रिय एजेन्सीहरूले गरेको दोहोरो खोजीमाथि प्रश्न उठाइरहेको छ।
हिन्दुस्थान समाचार / भवानी थामी
