तेहरान/वाशिङ्गटन, २० अप्रेल (हि.स.)। ईरान र अमेरिकाको युद्ध विराम अवधिमा ओमानको खाड़ीमा भएको घटनाले दुवै देशको शान्ति वार्ताका प्रयासमा प्रतिकूल असर पारेको छ। ईरानको सेनाले आइतबार चेताउनी दिंदै अमेरिकाले कन्टेनर जहाजमा गोली चलाएको र उसलाई आफ्नो नियन्त्रणमा लिएकोमा बदला लिइने बताएको छ। ईरानको सरकारी प्रसारण संस्था आईआरआईबीका अनुसार, ईरानको सेनाले टेलिग्राममा एक पोस्टमा भनेको छ, “आक्रमणकारी संयुक्त राज्य अमेरिकाले ओमान सागरको जल क्षेत्रमा युद्ध विरामको उल्लंघन गर्दै समुद्री मार्गमा डाका डालेको छ।”

सीएनएन, अल जजीरा, सीबीएस समाचारका रिपोर्ट अनुसार, ईरानको सेनाले भनेको छ कि अमेरिकाले जहाजका नौसञ्चालन (नेभिगेशन) उपकरणहरू नष्ट गरेको छ र जहाजको डेकमा आफ्ना सैनिक तैनाथ गरेर जफत गरेको छ। उक्त पोस्टमा भनिएको छ कि ईरानले सशस्त्र समुद्री डकैतीको जवाफ चाँडै दिनेछ।

यस बीच अमेरिकी सेनाले पुष्टि गरेको छ कि एक अमेरिकी विध्वंसक जहाजले ईरानी झण्डा लगाएको एउटा जहाजमा केही गोली चलाएको थियो। उक्त जहाजले अमेरिकी नौसैनिक नाकाबन्दी तोड्ने प्रयास गरिरहेको थियो। अमेरिकी सेण्ट्रल कमान्डले आइतबार यस घटनाका बारेमा आधिकारिक विज्ञप्ति जारी गरेको छ। यस कमान्डले भनेको छ कि नाकाबन्दी शुरु भएदेखि अमेरिकाले २५ व्यापारिक जहाजलाई फर्किन वा ईरानका कुनै बन्दरगाहमा फर्किन निर्देशन दिएको छ।

ओमानको खाड़ीमा भएको यस घटनाको केही घण्टा अघि राष्ट्रपति डोनाल्ड ट्रम्पले ईरानसँग बातचीत गर्नका लागि आफ्नो टोली इस्लामाबाद पठाउन लागिरहेको बताएका थिए। ईरानले भनेको छ, जबसम्म अमेरिकाले आफ्नो नाकाबन्दी हटाउँदैन, तबसम्म कुनै प्रकारको बातचीत हुने छैन। यस बीच ईरान फार्स समाचार एजेन्सीले बताएको छ, युद्धको अवधिमा क्षति भएका सरकारी भवनहरू बेच्ने निर्णय गरिएको छ।

यस बीच ईरानका राष्ट्रपति मसूद पेजेश्कियनले आइतबार पाकिस्तानका प्रधानमन्त्रीका साथ टेलिफोनमा भएको छलफलमा होर्मुज जलडमरूमध्यमा अमेरिकाको नाकाबन्दीले युद्धविराम सम्झौता उल्लंघन गरेको बताए। राष्ट्रपतिले पाकिस्तानका प्रधानमन्त्री शहबाज शरीफलाई चेताउनी पनि दिए। उनले भने, ईरानलाई आशङ्का छ कि ट्रम्पले “कूटनीतिक रूपमा विश्वासघात गर्नेछन्।”

राष्ट्रपति ट्रम्पले आइतबार आफ्नो सोशल मिडिया “ट्रुथ सोशल” मा घोषणा गरेका छन्, एउटा ईरानी मालवाहक जहाजले होर्मुज जलडमरूमध्यमा अमेरिकी नाकाबन्दीलाई छक्याउने प्रयास गरेको थियो। अहिले त्यो जहाज अमेरिकाको नियन्त्रणमा छ र अमेरिकाले त्यस जाँच जहाजमा के‑के छ भनेर जाँच गरिरहेको छ।

---------------

हिन्दुस्थान समाचार / बिशाल