नयाँ दिल्ली, 30 अप्रेल (हि.स.)। दिल्लीको द्वारकाको सेक्टर 24 स्थित गोल्फ कोर्स कम्प्लेक्सको पोखरीमा आज बिहान तीन जना बालबालिका डुबे। बालबालिकाहरू गहिरो पोखरीमा गएर डुबेको आशंका गरिएको छ। तीनै जनाको शव निकालिएको छ। पुलिसले नजिकैका बासिन्दाहरूको सहयोगमा उनीहरूको पहिचान गर्ने प्रयास गरिरहेको छ।

पुलिस अनुसार, बिहान 7.07 बजीतिर सेक्टर 23 द्वारका थानामा तीन बालबालिका सेक्टर 24 गल्फ कोर्स पोखरीमा डुबेको पीसीआर कल आएको थियो। जानकारी पाएपछि थाना प्रभारी आफ्नो टोली सहित त्यहाँ पुगे। दमकल विभाग र अन्य सम्बन्धित निकायहरूलाई बोलाइयो। केही बेरको प्रयासपछि तीन बालबालिकालाई पोखरीबाट बाहिर निकालियो।

पुलिस अधिकारीहरूले बताए, बालबालिकाहरू लगभग 8 देखि 10 वर्षबीच छन्। उनीहरूको लुगा पोखरीको किनारमा भेटिएको छ। उनीहरू नुहाउने उद्देश्यले पोखरीमा पसेको आशंका गरिएको छ। पुलिसको भनाई छ, प्रारम्भिक अनुसन्धानले यो दुर्घटना भएको देखाउँछ। कुनै पनि थानामा बालबालिका हराएको रिपोर्ट गरिएको छैन। वरपरको क्षेत्रको सीसीटीभी फुटेज जाँच गरिँदैछ।

यस घटनाले क्षेत्रमा शोकको लहर छाएको छ। स्थानीयहरूले भविष्यमा यस्ता घटनाहरू हुन नदिन खुला पानीका स्रोतहरू र पोखरीहरू वरिपरि सुरक्षा व्यवस्था बलियो बनाउन माग गरेका छन्। द्वारका जिल्लाका पुलिस उपायुक्त कुशल पाल सिंह अनुसार, अनुसन्धान जारी छ र बालबालिकाको पहिचान भएपछि उनीहरूका परिवारलाई जानकारी गराइनेछ।

हिन्दुस्थान समाचार / भवानी थामी