काठमाडौ, ११ मई (हि.स.)। टर्किस एयरको विमान धावनमार्गबाट हटाइएपछि नेपालको राजधानी काठमाडौंस्थित त्रिभुवन अन्तरराष्ट्रिय विमानस्थलमा उडान सञ्चालन पुनः शुरु भएको छ। अवतरण गर्ने क्रममा टर्किस एयरको विमानमा आगलागी भएपछि विमानस्थल करिब दुई घण्टा बन्द गरिएको थियो।
विमानस्थल कार्यालयका अधिकारी छबी ठकुल्लाले बिहान ९ बजी विमानस्थल पुनः सञ्चालनमा आएको बताए। डाइभर्ट गरिएका उडानहरू अब अवतरणको प्रक्रियामा छन्। काठमाडौं विमानस्थल बन्द हुँदा वाराणसीबाट बुद्ध एयरको उडान सिमरा विमानस्थल, श्री एयरलाइन्सको उडान विराटनगर, एयर इन्डियाको उडान दिल्ली र फ्लाई दुबईको उडान लखनऊ डाइभर्ट गरिएको थियो।
यो समाचार लेख्दासम्म दिल्लीबाट एयर इन्डियाका उडानहरू, शारजाहबाट एयर अरेबियाका उडानहरू, दोहाबाट कतार एयरका उडानहरू, दुबईबाट फ्लाई दुबईका उडानहरू र मलेसियाबाट नेपाल एयरलाइन्सका उडानहरू अवतरण भइसकेका छन्। हङकङबाट आइपुगेको हिमालय एयरलाइन्सको उडान हाल अवतरणको तयारीमा छ।
रनवे बन्द भएका कारण काठमाडौं विमानस्थलबाट उडान भर्न नसकेका एयर इन्डिया (दिल्ली), हिमालय एयरलाइन्स (ल्हासा), जजीरा एयर (कुवेत), एयर अरेबिया (शारजाह) र बुद्ध एयर (वाराणसी) लाई सञ्चालन गर्न अनुमति दिइएको छ। आगलागी भएको टर्किस एयरको विमानको काठमाडौं-इस्तानबुल उडान रद्द गरिएको छ। दुर्घटनाका कारण आन्तरिक उडानहरू पनि ढिलाई भएका छन्।
हिन्दुस्थान समाचार / बिशाल
