देहरादून, 11 मई (हि.स.)। मौसम विज्ञान केन्द्र देहरादूनले १२ र १३ मईमा उत्तराखण्डका धेरै पहाडी जिल्लाहरूमा भारी वर्षा, असिना, चट्याङ तथा प्रतिघण्टा ६० किलोमिटरसम्मको वेगमा हुरी चल्न सक्ने चेताउनी आज जारी गरेको छ। त्यसपछि प्रशासनले चारधाम यात्रुहरू र पर्यटकहरूलाई विशेष सतर्कता अपनाउन अपील गरेको छ।

केन्द्रको पूर्वानुमान अनुसार, उत्तरकाशी, रुद्रप्रयाग र चमोली जिल्लाका धेरै स्थानमा हल्कादेखि मध्यम वर्षा र गर्जनसहित पानी पर्ने सम्भावना छ। ४५०० मिटर वा सोभन्दा माथिका क्षेत्रमा हिमपात हुन सक्ने बताइएको छ। अन्य पहाडी जिल्लाहरूमा पनि केही स्थानमा वर्षा हुन सक्छ भने तराई क्षेत्रमा कतैकतै हल्का वर्षा र गर्जनको सम्भावना रहेको छ।

मौसम विज्ञान केन्द्रले १२ र १३ मईमा मौसम परिवर्तनका कारण पैह्रो जाने, ढुङ्गा खस्ने, सडक अवरुद्ध हुने तथा होचा क्षेत्रमा जलमग्न हुने अवस्था सिर्जना हुन सक्ने चेताउनी दिएको छ। त्यसैले चारधाम यात्रा मार्गहरूमा विशेष सावधानी अपनाउन आग्रह गरिएको छ। तीर्थयात्री र स्थानीयवासीलाई सुरक्षित स्थानमा बस्न, रुखमुनि आश्रय नलिन तथा संवेदनशील भीर र नदी-खोल्साको आसपास सावधानी अपनाउन भनिएको छ। केन्द्रका अनुसार, आगामी एक-दुई दिनमा अधिकतम तापक्रम १ देखि ३ डिग्री सेल्सियससम्म बढ्न सक्नेछ। त्यसपछि पुनः तापक्रम घट्ने सम्भावना रहेको छ।

पहाडी क्षेत्रमा प्रतिकूल मौसमको सम्भावनालाई ध्यानमा राख्दै गढ़वाल आयुक्त विनय शंकर पांडेयले चारधाम यात्रामा आउने श्रद्धालु तथा पर्यटकहरूलाई मौसमको ताजा जानकारी लिएर मात्र यात्रा गर्न आग्रह गरेका छन्। उनले मौसम सामान्य भएपछि यात्रा गर्नु बढी सहज हुने बताएका छन्। साथै प्रशासन र स्थानीय अधिकारीहरूले जारी गरेका निर्देशनहरूको पालना गर्न पनि सबैलाई अनुरोध गरेका छन्।

---------------

हिन्दुस्थान समाचार / भवानी थामी