जङ्गु, 13 मई (हि.स.)। स्वच्छताको दिशामा महत्वपूर्ण कदम चाल्दै पासिङदाङ खण्ड प्रशासनिक केन्द्रले “स्क्यान, रिपोर्ट, प्रोटेक्ट- जङ्गु” नामक वास्तविक समय फोहोर अनुगमन प्रणाली औपचारिक रूपमा शुरु गरेको छ। क्षेत्र विधायक तथा मन्त्री पिन्चो नामग्याल लेप्चाले आज साङ्कालाङ प्रवेशद्वारमा क्यूआर संकेतपट्टिको उद्घाटन गरे। यस पहलले परम्परागत फोहोर सङ्कलन प्रणालीबाट समुदाय-आधारित सक्रिय व्यवस्थापन प्रणालीतर्फको महत्वपूर्ण परिवर्तनलाई संकेत गरेको छ।

पासिङदाङ खण्ड प्रशासनिक कार्यालयद्वारा आज जारी विज्ञप्ति अनुसार, यो परियोजना प्लास्टिक फोहोर व्यवस्थापन एकाइको रणनीतिक विस्तारका रूपमा तयार गरिएको हो। यसले वास्तविक समय निगरानीलाई सुदृढ़ बनाउने, स्थानीय उत्तरदायित्व बढाउने तथा जङ्गुको स्वच्छ प्राकृतिक पर्यावरण संरक्षणमा जनसहभागिता अभिवृद्धि गर्ने लक्ष्य राखेको छ। यो महत्वाकांक्षी योजना मन्त्री तथा क्षेत्र पिन्चो नामग्याल लेप्चाको दूरदर्शी नेतृत्वमा कार्यान्वयन गरिएको हो।

जानकारी दिने प्रक्रियालाई सहज बनाउन मुख्य सडक किनार, पर्यटकीय स्थल तथा ग्राम पञ्चायत क्षेत्रका महत्वपूर्ण स्थानहरूमा स्पष्ट रूपमा देखिने क्यूआर संकेतपट्टि जडान गरिएको छ। यस प्रणालीका प्रमुख विशेषताहरूमा तत्काल जानकारी दिन सक्ने, २४ घण्टाभित्र आवश्यक कार्यवाही गर्ने व्यवस्था, केन्द्रिय निगरानी रहेका छन्।

जङ्गु संरक्षित क्षेत्र भएकाले प्रशासनले फिदाङ (लोअर जङ्गु) र साङ्कालाङ (अप्पर जङ्गु) का मुख्य जाँच केन्द्रहरूमा सबै बाह्य आगन्तुक तथा पर्यटकका लागि अनिवार्य दर्ता प्रणालीलाई थप कडाइका साथ लागू गरिएको छ। प्रवेशका बेला आगन्तुकहरूलाई जङ्गुको “फोहोरमुक्त आचारसंहिता” बारे जानकारी दिइनेछ।

जिम्मेवार पर्यटन प्रवर्द्धनका लागि आगन्तुकहरूलाई सांस्कृतिक सम्पदा, आकर्षणका स्थल तथा दिगो पर्यापर्यटनसम्बन्धी मार्गनिर्देशन समेटिएको पुस्तिका पनि उपलब्ध गराइनेछ।

परम्परागत संरक्षण चेतनालाई आधुनिक प्रविधिसँग समन्वय गर्दै जङ्गु सामुदायिक नेतृत्वमा आधारित फोहोर व्यवस्थापनको नमुना क्षेत्र बन्ने दिशामा अघि बढिरहेको छ। यो पहल “स्वच्छ भारत अभियान (ग्रामीण)” का उद्देश्य अनुरुप रहेको बताइएको छ।

खण्ड प्रशासनले सम्पूर्ण नागरिक तथा आगन्तुकहरूलाई यस पवित्र भूमिको सम्पदा जोगाउन सामूहिक जिम्मेवारीको भावना अपनाउन हार्दिक आग्रह गरेको छ।

---------------

हिन्दुस्थान समाचार / बिशाल